सहमतिया घोषणा प्रधानमन्त्रीया भारत भ्रमण लिपा जक
शान्ति प्रक्रिया बारे प्रमुख राजनीतिक दलत सहमति नापसं थ्यंसां उकिया घोषणा धाःसा प्रधानमन्त्री डा. बाबुराम भट्टराईया भारत भ्रमण लिपा जक जुइगु जूगु दु ।
शान्ति प्रकृयाया विवादास्पद विषयसं मू मू स्वंगू दलतय्सं बिहीवाः हे सहमति यायेगु धाःसां प्रधानमन्त्री भट्टराई बिहीवाः हे भारत भ्रमणय् झायादीत्यंगुलिं थप गृहकार्य यायेत ई मगागुलिं सहमतिया घोषणा लिपा जक जुइगु जानकारी नेतातय्सं बिउगु दु । बिहीवाः सुथय् प्रधानमन्त्री निवास बालुवाटराय् जूगु स्वंगू दलया मुँज्याय् दलत सहमति नापसं थ्यंगु जानकारी नं नेतातय्सं बिउगु खः ।
थ्वस्वयां न्ह्यः बुधवाः बहनी बालुवाटारय् हे च्वंगु एकीकृत नेकपा (माओवादी), नेपाली कांग्रेस व नेकपा (एमाले)या शीर्ष नेतात दथुइ जूगु सहलहपाखें लडाकुया ल्याः, पुनःस्थापनाया प्याकेज, राय्किंग लिसेंया मू मू न्यागू विवाद जुयाच्वंगु विषयस सहमति लिक्क थ्यंगु खः ।
सहलहया कथं सहमतिया प्रस्ताव दयेकेत मुँज्यां स्वंगू दलिय कार्यदल दयेकूगु खः । उगु कार्यदलय् माओवादीपाखें अर्थमन्त्री वर्षमान पुन 'अनन्त', कांग्रेसपाखें महामन्त्री कृष्णप्रसाद सिटौला व एमालेपाखें भीम रावल च्वनादीगु खः ।
श्रोतया कथं खुद्वः निसें च्याद्वः लडाकुतय्गु समायोजन यायेगु, न्यागू निसें झिगू लखया पुनःस्थापना प्याकेज दयेकेगु लगायत विषयस दलत सहमति लिक्क थ्यंगु खः ।
