रक्षा व भूमिसुधार मन्त्री पदमुक्त
प्रधानमन्त्री डा. बाबुराम भट्टराईं रक्षामन्त्री शरतसिंह भण्डारी व भूमिसुधार मन्त्री प्रभू साहयात पदमुक्त यानादीगु दु ।
व्यवस्थापिका संसदया बुधवाःया मुँज्याय् न्वंवानादिसें वय्कलं निम्ह मन्त्रीयात पदमुक्त यानागु घोषणा यानादीगु खः । प्रधानमन्त्री भट्टराईं संसद मुँज्याय् न्वंवानादिसें सम्बन्धित दलया सिफारिसय् निम्ह मन्त्रीयात चीकाःगु जानकारी बियादिल । निम्ह मन्त्रीयात चीकेत माग यानाः प्रतिपक्षी दलतय्सं छवाः न्ह्यःनिसें संसद् मुँज्या अवरुद्ध यायेवं माओवादीपाखें सरकारय् दुथ्याःम्ह भूमिसुधार मन्त्री शाहयात लित सतेगु उगु पार्टीं निर्णय यायेवं थ्व स्वया न्ह्यः हे मन्त्री शाहं राजिनामा बियादीगु खः ।
भण्डारीं राष्ट्र कुचाथलेगु अभिव्यक्ति बिइवं विवादय् लाःगु खःसा साहयात वीरगञ्जय् विश्व हिन्दु युवा संघया नायः काशीनाथ तिवारी स्याःगु द्वपं ब्यूगु खः । बुधवाः पदमुक्त जुयादीपिं रक्षामन्त्री भण्डारीया भाला उपप्रधान लिसे गृहमन्त्री विजय गच्छेदारयात व भूमिसुधार मन्त्रीया भाला मन्त्री तोपबहादुर रायमाझीयात ब्यूगु दु ।
थ्वहे झ्वलय् सदनय् न्ववानादिसें प्रधानमन्त्री भट्टराईं सरकारं बृहत् शान्ति सम्झौता अःखः सुयागु नं मुद्दा लित मकायेगु प्रतिबद्धता प्वंकादिल । अथेहे प्रधानमन्त्री भट्टराईं बिहीवाः निसें न्ह्याइगु भारत भ्रमणय् छु नं दीर्घकालीन लिच्वः लाइगु सम्झौता मयायेगु प्रतिबद्धता नं प्वंकादिल । वय्कलं राष्ट्रिय मुद्दाय् समस्या लाकीगु यानाः कथं सदन पंगः मथनेत प्रतिपक्षी दलयात इनाप यानादिल ।
