सैनिक विमान दुर्घटना बारे छानबिन यायेत समिति नीस्वन
बाग्लुङय् मंगलवाः बहनी जूगु सैनिक विमान दुर्घटनाबारे छानबिन यायेत नेपाली सेनां न्हय्म्ह दुजः दुगु छानबिन समिति नीस्वंगु दु । सैनिक जनसम्पर्क निर्देशनालयं बुधवाः छगू विज्ञप्ति पिथनाः सहायक रथी पाइलट सुधिर श्रॆष्ठया संयोजकत्वय् न्हय्म्ह दुजः दुगु छानबिन समिति नीस्वंगु जानकारी ब्यूगु दु ।
नेपालगञ्जपाखें बिरामी ज्वनाः येय् वयेगु झ्वलय् बाग्लुङ जिल्लाया बाग्लुङया वोवाङ गाविस वडा नं ९ सं लाःगु ग्वार्कोटय् सेनाया आर.ए.एन. फोर्टी नाइन आइलेण्डर विमान दुर्घटना जूगु खः । दुर्घटनाय् लानाः विमानय् सवार फुक्क खुम्हं मनूत सीगु खः । नेपाली सेनाया सैनिक हेलिकप्टरपाखें सीपिं खुम्हसिया शव येँय् हःगु दु ।
विमान दुर्घट्नाय् लानाः चालक दिवाकार कार्की व विशाल सिंह राठौर, विरामी केशव ऐर व विरामी कुरुवा वया दाजु रामहरी ऐर, डा. रविता पाठक व मिलन गोतामे सीगु खः ।
