सहमतिया रजनीति मत्वतेत माओवादीयात इनाप
थीथी राजनीतिक दलया नेतातय्सं एकीकृत नेकपा (माओवादी)यात नं सरकारय् दुथ्याकाः संविधान निर्माण व शान्ति प्रकृयायात तार्कित निष्कर्षय थ्यंकेमाःगु खँ धाःदु ।
बुधवाः येँय् जूगु छगू ज्याझ्वलय् कांग्रेस उपसभापति गोपालमान श्रेष्ठं माओवादीं नं सरकारय् ब्वति कायेमाःगु खँ धयादीगु दु । वयेकलं आग्रह-पूर्वाग्रह स्वयां च्वये थांवानाः राष्ट्रिय सहमतिया सरकाय् ब्वति कायेगुया विकल्प मदु धयादिल ।
नेकपा (एमाले)या पोलिटब्यूरो दुजः रघुजी पन्तं माओवादी निलाः-स्वलाःया दुने माधवकुमार नेपालया नेतृत्वय् सरकारय् वइगु धयादिल । नेपाली राजनीतिइ बीचा हे मयाः कथंया घटनाक्रम जुयाच्वंगु धासें नेता पन्तं माओवादी नं स्वलाःया दुने सरकारय् वइगु दाबी यानादिल ।
ज्याझ्वलय् माओवादीया सचिवालय दुजः लिलामणि पोखरेलं वर्तमान सरकार नाप संवाद नं जुइमफइगु धयादिल । नागरिक सर्वोच्चतायात हाचांकाःया सैनिक सर्वोच्चतायात संस्थागत यायेत गठन जूगु सरकार धासें अज्याःगु सरकारं माओवादीयात सरकारय् ब्वति कायेत याःगु इनाप हास्यास्पद जूगु धयादिल ।
अथेहे तराई-मधेश लोकतान्त्रिक पार्टीया उपाध्यक्ष महेन्द्र राय यादवं राष्ट्रिय सहमति निर्माण यानाः न्ह्याः वनेगुया विकल्प मदु धयादिल । राष्ट्रिय प्रजातन्त्र पार्टीया प्रवक्ता परशुराम खापुङं राष्ट्रिय सहमति यानाः वनेमाःगस खँ बः बियादिल ।
