एमालेपाखें न्यूनतम साझा ज्याझ्व प्रस्तुत

एमाले नेतृत्वयात समर्थन याःगु दलतय् बैठकय् सरकारया न्यूनतक साझा ज्याझ्व, सरकारया स्वरुप व मन्त्रालय बाँडफाँड बारे सुझाव बीत छगू कार्यदल गठन याःगु दु ।

बुधवाः च्वंगु बैठकय् थुकीया बारे सहमति मजुइवं थप सहलह यायेगु जिम्मा कार्यदलयात ब्यूगु दु । कार्यदलय् कांग्रेस, एमाले, फोरम व तमलोपाया नेतात च्वंगु दु । कार्यदलं सरकारया न्यूनतम साझा ज्याझ्वया निर्णय याइ ।

सिंहदरवारय् च्वंगु प्रधानमन्त्रीया ज्याकूथी एमाले नेतृत्वयात समर्थन याइगु नीनिगू दलतय्त सःतुगु खसां झिंखुगू दलतय् जक सहभागिता दुगु खः । बैठकं प्रधानसेनापति रुक्मागं कटवालया पदमुक्त यायेगु व रथी कुलबहादुर खडकायात कामु प्रधानसेनापति देयेकेगु माओवादी सरकारया निर्णय खारेज यायेत प्रधानमन्त्रीयात इनाप याःगु दु ।

अथेहे बैठकं राज्य पुर्नसंरचना मन्त्रालय खारेज यानाः आयोग गठन यायेगु व संविधानसभा मामिला मन्त्रालयया नां हिकाः संसदीय मामिला मन्त्रालय् देयेकेगु निर्णय जूगु दु । नापं बैठकय् दलतय्सं माओवादीं राष्ट्रपति विरुद्ध व्यवस्थापिका संसदय् दर्ता याःगु संकल्प प्रस्तावयात संसदय् महेत सभामुखयात इनाप यायेगु निर्णय नं याःगु दु ।

बैठकय् एमालें न्येयगु बुँदा दुथ्याःगु मंकाः न्युनतम ज्याझ्वः न्ह्यब्वःगु दु । थुकीयात दलतय् बैठकय् थप सहलह याये धुंकाः तिनि अन्तिम रुप बीगु निर्णय जूगु दु । एमालें न्ह्यब्वःगु ज्याझ्वलय् मधेशवादी दलत नाप जूगु सम्झौता कार्यान्वयन यायेगु प्रतिबद्धता प्वंकातःगु दु । अथेहे संविधान नाप स्वापू दुगु सम्झौतायात संविधानसभा पाखें निर्णय यायगु खँ न्ह्यथंनातःगु दु । राष्ट्रिय एकता व हितया समवद्र्धन, गणतन्त्र कार्यान्वयन व राज्य पुर्नसंरचना, शान्ति सुरक्षाया प्रत्याभूति, तात्कालिन राहत व पुर्ननिर्माण व आर्थिक व सामाजिक रुपान्तर यानाः न्यागू ब्वय् थलाः मंकाः न्युनतम ज्याझ्व न्ह्यब्वःगु दु ।

अथेहे एमालें सरकार संचालन यायेत बैठकय् झिंस्वंगु बुँदे प्रस्ताव नं न्ह्यब्वःगु खः ।