कम्प्युटर मुयाः छम्ह सशस्त्र प्रहरीया हवल्दार सित
वीरगञ्जय् मंगलवाः सुथय् छगः कम्प्युटर मुयाः छम्ह सशस्त्र प्रहरीया हवल्दार सीगु दु । सीम्ह वीरगञ्ज भन्सार सुरक्षा बेस क्याम्पय् ज्या यानाच्वंम्ह सशस्त्र प्रहरी हवल्दार केदार काफ्ले खः । मंगलवाः सुथय् १०:१५ बजे वीरगञ्ज भन्सार ज्याकुया लागाय् दुगु सशस्त्र प्रहरीया राजस्व भन्सार सुरक्षा बेसया सञ्चार कक्षय् दुगु कम्प्युटर चायेकेत्यंगु इलय् मुयाः घाःपाः जूम्ह काफ्ले वीरगञ्जस्थित नेशनल मेडिकल कलेजय् वास यायेगु झ्वलय् सीगु खः ।
विस्फोटय् लानाः सशस्त्र प्रहरी नायव निरिक्षक हरीकृष्ण खड्का व सहायक निरीक्षक राम लामा घाःपाः जूगु पर्सा प्रहरीं जानकारी बिउगु दु । घाःपाः जूपिं निम्हसिया नं नेशनल मेडिकल कलेजय् वासः जुयाच्वंगु दु । घटना गुकथं जुल धइगु बारे छानबिन जुयाच्वंगु ससस्त्र प्रहरी उपरीक्षक राम विकं जानकारी ब्यूगु दु ।
