डा. सत्यमोहन जोशीं हलिं नेवाः तःमुँज्याया उलेज्या यानादीगु
वर्ल्ड नेवाः अर्गनाइजेशन व पासा पुचः गुथि यूकेया मंकाः ग्वसालय् थ्वहे ने.सं. ११३२ कछलाथ्वः तृतिया निसें पंचमितक (October 29-31, 2011) स्वन्हुयंक बेलायतया लण्डनय् न्हापांगु हलिं नेवाः तःमुँज्या (World Newah Convention) जुइगु जूगु दु । नेवाःख्यःया हनेबहःम्ह व नेपालभाषा एकेदेमीया चान्सलर लिसें संस्कृतिविद् भाजु डा. सत्यमोहन जोशीजुपाखें थुगु न्हापांगु तःमुँज्याया उलेज्या यानादीगु व हनेबहःम्ह प्राध्यापक भाजु माणिकलाल श्रेष्ठं मून्वचु बियादीगु धाःगु दु । तःमुँज्या ग्वसाःखलः वर्ल्ड नेवाः अर्गनाइजेशन तदर्थ समितिया नायः भाजु दयारत्न शाक्यं पितब्यूगु प्रेस विज्ञप्तिइ थुगु खँ न्हयथना तःगु खः ।
विश्वन्यंक च्वनाच्वंपिं नेवाःतय्गु समस्याय् ग्वहालि यायेत नापं नेवाःजाति, नेपालभाषा, नेवाः तजिलजिया संरक्षण व सम्बर्दनया ज्या यासें नेपाःदुनेया थीथी जाति, भाषा, धर्म, संस्कृति आदि ख्यलय् दयेमाःगु समान अधिकार अवसर व्यवहारय् दयेमाःगु सःयात अझ तिबः बिसें नेवाः जाति, नेपालभाषा, नेवाः तजिलजियात दयेमाःगु समान अधिकार, अवसर व्यवहारय् छ्यला यंकेत मंकाः सःतयेगु पाखे माःगु ज्या यायेगु लागिं थुगु मुँज्यां पलाः ल्व्हनेगु धयातःगु दु ।
नेपाः लगायत नेपालंपिनेया हलिंन्यंक थीथी थासय् च्वनाः नेवाः जाति, भाषा, धर्मप्रति सचेत जुयाः ज्या यानाच्वंपिं व थीथी ख्यलय् थःगु योगदान बियाच्वंपिं व्यक्ति व हलिंन्यंकया नेवाः खल:, पुचः, गुथिं थुगु तःमुँज्याय् ब्वति कयादीगु नं ग्वसाखलकं मनंतुगु न्हयथनातःगु दु ।
थुगु हे तःमुँज्याय् नेवाः साहित्यिक व प्राज्ञिक सभा नं यायेगु धाःगु दु । थुगु प्राज्ञिक सभाय् नेवाः सम्बन्धी समस्या व समाधानयात कयाः च्वयातःगु अनुसन्धानमुलक च्वसुत प्रस्तुत जुइ । थुगु तःमुँज्याय् लण्डन घोषणा पत्र पितबिसें वर्ल्ड नेवाः अर्गनाइजेशनया विधान नं न्ह्यब्वयाः तःमुँज्या क्वचायेकेगु ज्याझ्वः दुगु विज्ञप्तिई न्हयथातःगु दु ।
