न्हूदँ समारोह संयोजन पुचः ११३२ नीस्वन

नेपालभाषा मंकाः खलः येँया ग्वसालय् आइतवाः जूगु छगू ज्याझ्व:या दथुइ नेपाल संवत् ११३२ राष्ट्रिय न्हूदँ समारोह संयोजन पुचः नीस्वंगु दु । ज्याझ्वलय् राज्य स्तरं हे न्हूदँ समारोह समिति दयेकेत यायेमाःगु ज्याखँत यायेत ११म्हेसिया न्हूदँ समारोह संयोजन पुचः नीस्वंगु खः । थुगु समितिं राज्यस्तरं न्हूदँ हंकेगु लागि माःगु ज्या यायेगु व यदि राज्यस्तरं समिति नीस्वन धाःसा थुगु पुचः स्वतः खारेज जुइगु मखुसा थुगु हे समितिं न्हूदँया ज्याझ्वः यायेगु धाःगु दु ।

थौं जूगु ज्याझ्वलय् पुचलय् पद्मरत्न तुलाधर(नेपालभाषा मंकाः खलः,येँ), नरेश ताम्राकार (नेवाः देय् दबू), डा. केशवमान शाक्य (नेपाः राष्ट्रिय पार्टी), नरेशवीर शाक्य (नेपालभाषा मंकाः खलः,येँ), लक्ष्मीदास मानन्धर (उद्योगपति), सुजिव वज्राचार्य (जागरण मञ्च), मोहन कृष्ण डंगोल (ज्यापु महागुथि), पंचलाल महर्जन(किपू), कृष्ण बहादुर घःजु (थिमि, ख्वप), किरण शाक्य (नेपालभाषा मंकाः खलः,यल) व सरिता महर्जन (मिसा प्रतिनिधि) च्वनादीगु खः । समितिया पदाधिकारीत सोमवाः सुथसिया ८ ताःइलय् क्षेत्रपार्टी पालेसय् मुँज्या च्वना ज्याझ्वः त क्वःछिइगु धाःगु दु ।

न्हूदँ समारोह ११३१ या नायः भाजु विपेन्द्र महर्जनया सभापतित्वय् येँया तलेजु पार्टी पालेस जूगु थुगु ज्याझ्वलय् थीथी व्यक्तिपिंसं थःथःगु नुगः खँ तयादीगु खः । मंकाः खलः येँया नायः भाजु पद्मरत्न तुलाधरं सरकारं नेपाल संवतयात राष्ट्रिय संवत धका घोषणा याःसां सरकारी ख्यलय् गनं हे मछ्यःगु धयादिल । नेपाल संवतया प्रवर्तक शंखधर साख्वाःयात राष्ट्रिय विभूति धकाः घोषणा याःगुलिं नेपालभाषा आन्दोलनया छपला धिसिलाःगु न्ह्यथनादिसें वय्कलं न्हूदँ खुन्हु जुइगु भिंतुना र्‍याली आः वसन्तपुरय् जक लिकुंका मच्वंसें खुल्लामञ्चय् वनाः न्हूदँ हने माःगु खँ लिसाकयादिल ।

नेवाः जागरण मञ्जया संयोजक सुजिव वज्राचार्यं आः दयेकीगु न्हूदँ समारोह समिति राज्य स्तरं दयेकेमाःगु खँयात लसकुसयासें थथे राज्यं स्तरं दयेकीगु समितिइ भाजु पद्मरत्न तुलाधरया हे संरक्षणय् जुइमाःगु तर मंकाः खलःपाखें पदेन सदस्य धकाः छम्ह हे व्यक्ति विशेष जक सदां जुइमज्यूगु धयादिल । वय्कलं न्हूदँया भिंतुना र्‍याली धयागु छगू कथं नेवाःतय्गु शक्ति प्रदर्शन जूगु न्ह्यथनादिल ।

ज्याझ्वलय् न्हूदँ समारोह समितिया पुलांम्ह नायः भाजु लक्ष्मण राजवंशीं छुं नं खँ ख्वालय् न्ह्य:ने हे धायेमा, न्ह्य:ने छता व ल्यूने छता खँ ल्हायेगु याये मज्यु धकाः मंकाःखलःया बारे जुयाच्वंगु खँयात ईगित यासें थःगु नुगः खँ तयादिल । अथेहे भानु अनुप सिंह सुवालं आः दयेकीगु न्हूदँ समारोह समितिइ फुक्क जाति खलःया प्रतिनिधि दुथ्याइकथं जुइमाःगु धयादिल ।

ज्याझ्वलय् न्हूदँ समारोह समितिया मूछ्यांजे भाजु नरेशवीर शाक्यं ने.सं. ११३१ न्हूदँया ल्याःचाः नं न्हयब्वयादीगु खः ।