ट्राफिक व्यवस्थापन सहज यायेत प्रधानमन्त्रीया उजं
प्रधानमन्त्री डा. बाबुराम भट्टराईं स्वनिगःया ट्राफिक व्यवस्थापनयात सहज दयेकेत सम्बन्धित निकायतय्त माःगु उजं बियादीगु दु ।
प्रधानमन्त्री लिसे मन्त्री परिषद्या ज्याकू सिंहदरबारय् जूगु बहुपक्षीय सहलहसं प्रधानमन्त्री डा. भट्टराईं वंगु छुं दँनिसें बन्द जुयाच्वंगु माइतीघर-भद्रकाली सतक छवाःया दुने चायेकेत उजं बियादीगु दु । माइतीघर निसें भद्रकाली तक्कया सार्वजनिक सतक आइतवाः व सोमवाः नेपाली सेनां जक छ्यलेगु यानाच्वंगु दु । थ्व सतक जनयुद्धकालंनिसें हे सर्वसाधारणया नितिं बन्द अवस्थाय् दुगु खः ।
वय्कलं नीजि सवारी साधनतय्त बढावा मबीत व सार्वजनिक यातायातया साधनयात प्राथमिकता बिइत यातायात व्यवस्था मन्त्रालययात उजं बियादीगु खः । वय्कलं बन्द दुगु साझा यातायातयात नं याकनं न्ह्याकेत नं उजं बियादीगु दु। गुलिखय् अवस्थाय् नीतिगत रुपय् हे त्रुटि दुगु धयादिसें प्रधानमन्त्री भट्टराईं ज्याकूया ईयात हिलेफइगु जूसा वहे कथं नीतिइ हिउपाः हयेत उजं बियादीगु दु ।
अथेहे वय्कलं विशिष्ट मनूतय्गु सवारीइ तामझाम मयायेत उजं बियादिसें नीतिया नितिं मू छ्याञ्जे माधव प्रसाद घिमिरेयात उजं बियादीगु दु । येँ महानगरपालिका व सतक विभागं योजनाबद्ध ज्या मयागु धयादिसें प्रधानमन्त्री भट्टराईं थःथवय् समन्वय यानाः स्वनिगःया खुसि सिथय्या सतक याकनं व्यवस्थापन यायेत नापं उजं बियादीगु खः ।
वय्कलं स्वनिगलय् दुगु फुक्क होर्डिङ बोर्ड नापं याकनं चीकेत येा महानगरपालिकायात उजं ब्यूगु दु । स्वनिगलय् दुगु फुक्क होर्डिङ बोर्डत महानगरपालिका व ट्राफिक प्रहरीया समन्वयसं छवाःयादुने चीकीगु जूगु दु ।
सहलह ज्याझ्वलय् ट्राफिक प्रहरी प्रमुख गणेश राईं ट्राफिक व्यवस्थापनय् खनेदुगु समस्या व यायेफइगु माःगु सुधारया विषयसं ज्यापौ न्ह्यःब्वयादीगु खः । उगु हे सहलहसं नेपाल प्रहरी, विद्युत, यातायात, सतक, दूरसञ्चार, महानगरपालिका लगायत थीथी मन्त्रालयया छ्याञ्जेपिनिगु ब्वति दुगु खः ।
