नागरिक सर्वोच्चताया हे आधारय् न्हूगु सरकार : प्रधानमन्त्री

माओवादीयात सरकारय् ब्वति कायेत आह्वान

न्हूगु सरकार नागरिक सर्वोच्चताया प्रतिक

प्रधानमन्त्री माधवकुमार नेपालं नागरिक सर्वोच्चताया आधारय् हे न्हूगु सरकार गठन जूगु धासें माओवादीयात सरकारय् ब्वति कायेत आह्वान यानादिल ।

माओवादीं नागरिक सर्वोच्चता स्थापना मजूतल्ले सरकारयात छुं नं कथंया ग्वहालि मयायेगु धयाच्वंगु ईलय मंगलवाः देया नांमय् सम्बोधन यानादिसें प्रधानमन्त्री नेपालं जनतापाखें निर्वाचित व्यवस्थापिका संसदं सरकार निर्माण जूगुलि न्हूगु सरकार नागरिक सर्वोच्चताया प्रतिक जूगु दाबी यानादिल ।

नवनिर्वाचित प्रधानमन्त्री नेपालं माओवादीप्रति लक्षित यासें कार्यकारी स्वेच्छाचारिता नागरिक सर्वोच्चता मजूगु धासें खँया थःपिंत य:थें व्याख्या मयायेत इनाप यानादिल ।

वयेकलं माओवादीं एमालेयात राष्ट्रपतिया निर्वाचनय् धोका ब्यूसां माओवादी नेतृत्वया सरकारय् एमालें ब्वति काःगु धासें शान्ति प्रकृयायात न्हयने यंकेत वर्तमान सरकारय् ब्वति कयाः ग्वहालि यायेत माओवादी यात इनाप यानादिल । वयेकलं, - 'एकीकृत माओवादी लगायतया दलत नाप परिस्थितिजन्य परिघटनाया रुपय् खनेदुगु असमझदारी व तिक्तता पाखें दनाः राष्ट्रिय सहमतिया आधार निर्माण यायेत न्हूगु अग्रसरताया साथ न्ह्याः वनेत हार्दिक अपिल दु ।' वयेकलं उकीया निंतिं सरकार थःगु पाखें दक्वं प्रकृया न्ह्याकेत तत्पर जूगु धयादिल ।

थःयात द्वपं बीयातःगु खँया खण्डन यायेत थःगु सम्बोधनया बःगु ई फुइकादीगु प्रधानमन्त्री नेपालं नेपाली सेनाया नं प्रशंसा यानादिल । नेपाली सेनां लोकतन्त्रिक परिवर्तन व गणतन्त्रयात आत्मसात याना म्हितुगु सकारत्मक भुमिकाया सरकारं प्रशंसा यानाःगु धासें वयेकलं, - 'शान्ति प्रकृयाया प्रत्येक चरणय् नेपाली सेनाया संवेदनशीलता प्रति सरकार सचेत जुइ ।' वयेकलं माओवाली जनसेनाया लडाकूतय् संवेदनशिलता प्रति सरकार गम्भीर जूगुलिं लडाकूतय् रेखदेख, पुर्नस्थापना व समायोजन मार्फत भविष्ययात सुनिश्चित यायेगु दायित्व सरकारं गम्भीरतापूर्वक बहन याइगु धयादिल ।

राष्ट्रवाद व विदेशी हस्तक्षेपया खँय् नं थःगु निहित स्वार्थय् आधारित जुया व्याख्या मयायेत व थुकीयात राजनीतिक दाउपेचया आधार मदेयेकेत इनाप यासें वयेकलं नेपालया राष्ट्रिय हित, सार्वभौमसत्ता, स्वतन्त्र अस्मिता, भौगोलिक अखण्डता व स्वाभिमानयात मछींकेगु छुं नं ज्या वर्तमान सरकारं मयाइगु धयादिल ।

संविधानसभा निर्वाचनय् बुम्ह नेता प्रधानमन्त्री जुल धकाः वयाच्वंगु द्वपंया खण्डन यासें प्रधानमन्त्री नेपालं थः नः मेपिं नेतात थें गुबलें त्याम्ह व गुबलें बुम्ह जुसां न्ह्यावलें नं राष्ट्र व जनताया पक्षय् ज्या यानावयाच्वंनाःगु खँ धयादिल ।

लिपांगु ईलय् खनेदयाच्वंगु राजनीतिक असमझदारीं शान्ति प्रकृयात स्यंकीगु व संक्रमणकाल ताःहाकः जुइगुलि च्यूताः प्वंकादिसें वयेकलं थीथी कथंया हाथ्याया समाना यासें मंकाः पहलय् थन तकः थ्यंगु शान्ति प्रकृयायात मिलेजुया हे क्वचायेकीगु खँ धयादिल ।