मन्त्रिमण्डल गठन बारे दलत दथुइ सहलह
न्हूगु सरकारय् मन्त्रालय् बाँडफाँडया खँय् कांग्रेस, मधेशी जनअधिकार फोरम व तराई-मधेश लोकतान्त्रिक पार्टीया नेतात दथुइ सहलह जूगु दु ।
मंगलवाः कांग्रेस सभापति गिरिजाप्रसाद कोइराला निवास महारजगंजय् जूगु सहलहलय् पार्टीतय्सं थःगु पार्टीयात देयेमाःगु मन्त्रालयया दाबी याःगु दु । संयुक्त लोकतान्त्रिक मधेशी मोर्चां कांग्रेस-एमाले बराबरया मन्त्रालय मोर्चायात नं बीमाःगु माग याःगु दु ।
फोरम संसदीय दलया नेता विजय कुमार गच्छादारं न्हूगु सत्ता समिकरण निर्माणय् मोर्चां महत्वपूर्ण भूमिका म्हितुगुलिं वहे कथं मन्त्रालय थःपिंतः बीमाःगु माग यानाःगु खँ धयादिल । मोर्चां प्रभावशाली, विकासे व सामाजिक यानाः मन्त्रालययात स्वंथू ब्वः थालाः वर्गिकरण यानाः भागबण्डा यायेमाःगु तर्क त:गु दु । थःपिंत गुंगू मन्त्रालय बीमाःगु दाबी मोर्चां याःगु दु । अथेहे सरकारया साझा न्युनतम कार्यक्रमय् मोर्चां ल्ह्वंगु मुद्दायात प्राथमिकता बिया न्ह्यथंने माःगु माग याःगु दु ।
थ्वहे दथुइ मंगलवाः संयुक्त लोकतान्त्रिक मधेशी मार्चां गृह मन्त्रालय सहित गुंगू मन्त्रालय माःगु याःगु दु । मधेशी जनअधिकार फोरमं एमाले नाप संयुक्त लोकतान्त्रिक मधेशी मोर्चायात गृह नापं स्थानीय विकास, भौतिक योजना व निर्माण, महिला बालबालिका व समाजकल्याण, स्वास्थ्य व जनसंख्या व शिक्षा मन्त्रालय बीमाःगु प्रस्ताव तःगु दु । मोर्चायात मुकं गुगूं मन्त्रालय् बीमाःगु प्रस्ताव तःगु खः । थ्व खुगू मन्त्रालयत बी हे माःगु व मेगू स्वंगू मन्त्रालय् न्ह्याःगु ब्यूसां जूगु प्रस्ताव फोरमं तःगु ख: । सरकारया नेतृत्व यानाच्वंगु एमालेनाप मंगलवाः जुगु सहलहलय् फोरमया नेतातय्सं थंज्याःगु माग न्ह्यब्वःगु खः ।
