नेपाल संवतया न्हूदँ राज्य स्तरं हे हनेत प्रमयाथाय् डेलिगेशन
नेवाः देय् दबूया इनापय् शुक्रवाः थःगु हे ज्याकुथिइ थीथी संघ संस्थालिसें जातिय खलःपुचः दथुइ छगू सहलह मुँज्या जुल । मुँज्यां नेपाःया मौलिक संवत् नेपाल संवतया न्हूदँ न्ह्य:ने वयाच्वंगुलिं आवंलि थथे नेपाल संवतया न्हूदँ हनेगु लागिं राज्य स्तरं हे 'न्हूदँ समारोह समिति' दयेकेमाःगु क्वःछ्यूगु खः । थथे राज्य स्तरं दयेकीगु न्हूदँ समारोह समितिं दच्छियंकंया ज्याझ्वः त क्वःछिउसें दँय्दसं हे थथे न्हूदँ समारोह समिति दयेकाः ज्याझ्वः याकेगु लिसें ज्याखँ त समितिं हे इनाबीगु खँ प्रस्तावय् न्हयथना तःगु दु ।
थ्वहे खँयात कयाः थौं प्रधानमन्त्री डा. बाबुराम भट्टराईयात नाप लायेत नेवाः देय् दबूया नायः भाजु नरेश ताम्राकारया नेतृत्वय् नीन्याम्हेसिया छगू पुचः बालुवाटार वंगु खः । नाप लायेगु झ्वलय् नेपाल सरकारया पाखें प्रधानमन्त्री डा. भट्टराईं थ्व खँयात सकारात्मक रुपं कयादीगु भाजु ताम्रकारं धयादीगु दु ।
किपा : न्हुच्छेकाजी महर्जन
