गैर आवासीय नेपाःमिपिंत स्वदेशय् लगानी यायेत प्रमया इनाप
प्रधानमन्त्री डा. बाबुराम भट्टराईं गैर आवासीय नेपाःमिपिंत स्वदेशय् लगानी यायेत इनाप यानादीगु दु । वय्कलं सन् २०१२-१३यात 'नेपा: लगानी दँ' घोषणा यायेगु तयारी जुयाच्वंगु धयादिसें नेपाःया आर्थिक विकासया निंतिं लगानी यायेत इनाप यानादीगु खः ।
गैर आवासीय नेपाली संघया न्याक्वःगु अन्तर्राष्ट्रिय सम्मेलनया बुधवाः उलेज्या यानादिसें वय्कलं न्हापांखुसी प्रधानमन्त्रीया हैसियतं आर्थिक सेल दयेकाः ज्या यायेगु कुतः न्ह्याकाःगु जानकारी बियादिल । वय्कलं प्रति व्यक्ति आम्दानी स्वद्वः डलर थ्यंकेगु महत्वाकांक्षी लक्ष्य तःगु धयादिसें कूल ग्रार्हस्थ उत्पादनया पीन्यागू प्रतिशत लगानी यायेगु लकस दयेकेत थः न्ह्यःज्यानाच्वनाःगु धयादिल । वय्कलं दच्छिया न्हय्गू लखयात रोजगार बिइफइगु लकस दयेकेमाःगु खँ नं न्ह्यथनादिल ।
शान्ति प्रकृया पूवनेधुंकाः व संविधान दय्केधुंकाःया एजेण्डा आर्थिक व सामाजिक विकास जूगु धयादिसें वय्कलं आर्थिक विकास मजुइकं शान्ति मजुइगु स्पष्ट यानादिल । नेपालय् न्हापा स्वयाः लगानी यायेत लकस सहज जूगु वय्कलं दावी यानादिल । मेगू छगू प्रशंगय् वय्कलं निलां संविधानया खाका वइगु दावी नं यानादिल ।
'झीगु सञ्जाल, झीगु म्हसीका : समृद्ध नेपाः' धइगु नारा लिसे गैरआवासीय नेपाली संघ (एनआरएन)या बुधवाः निसें येँय् न्ह्याःगु न्याक्वःगु विश्व सम्मेलनय् थीथी देय्पाखें थ्यंमथ्यं न्हय्सः प्रतिनिधतय् ब्वति दुगु जानकारी संघं ब्यूगु दु ।
सम्मेलनया झ्वलय् नेपालय् लगानी प्रर्बद्धन यायेगु सम्बन्धी थीथी विषयसं सहलह जुइगु ज्याझ्ज्यावः दु । स्वन्हुतक्क न्ह्याइगु उगु सम्मेलनय् न्यय्खुगू देय्या गैरआवासीय नेपाःमिपिं दथुइ नेपाःया आर्थिक लिसे सामाजिक विकासया निंतिं लगानीया सम्भावनाया क्षेत्रया बारे सहलह जुइ ।
एनआरएनं दोहोरो नागरिकता, मंकाः लगानीइ खुला विश्वविद्यालय, सामाजिक क्षेत्रय् एनआरएनया संलग्नताया विषययात मू मुद्दाया रुपय् ल्ह्वनाः वयाच्वंगु दु ।
अथेहे स्वन्हुतक्क न्ह्याइगु सम्मेलनं न्हूगु नेतृत्व नं ल्यइ । संघया न्हूगु नेतृत्वया निंतिं वर्तमान नायः देवमान हिराचन व न्वकु जीवा लामिछानें उम्मेदवारी घोषणा याःगु दु । हिराचन जापानय् व लामिछाने रुसय् व्यवसाय सञ्चालन यानाच्वंपिं गैरआवासीय नेपाःमित खः ।
