'नखःया इलय् नालाकाःगु न्हूगु सुरक्षा नीति सफल'
नेपाल प्रहरीं मोहनि नापं स्वन्ति व छठ नखःयात ध्यानय् तयाः नालाकाःगु न्हूगु सुरक्षा नीति ताःलाःगु जानकारी बिउगु दु ।
महानगरीय प्रहरी हनुमानढोकां बुधवाः छगू पत्रकार सम्मेलन यानाः नखःचखःया लसताय् मेमेगु इलय् स्वयां आपालं आपराधिक घटना जुइगु जूगुलिं उकियात पनेत न्ह्याकूगु नीति ताःलाःगु खँ धाःगु दु । नखःचखःया इलय् यात्रुतलिसे तच्वयेक भाडा कायेगु यानाच्वंगु झिंगुंगः ट्याक्सी व ड्राईभरतय्त नीप्यघौ कारवाही यानाः यातायात व्यवसाय विभागयात जिम्मा बियाःगु जानकारी प्रहरी नायव उपरिक्षक धिरज प्रसाद सिंहं बियादिल ।
अथेहे स्वन्ति नखःयात लक्षित यानाः स्वनिगःदुने अवैध कथं पटकाजन्य विष्फोटक पदार्थया बिक्री वितरणयात नियन्त्रण यायेगु झ्वलय् महानगरीय प्रहरीपाखें असोज २४ गते न्यागू लख बराबरया मल्ताबारा लिसे येँ वडा नं. २७ य् विकास महर्जन व भारतया विहारय् छेँ दुम्ह अनिल चौरसियायात ज्वंगु दु ।
