फोहोरया द्वँ व मनपाया पहः

हाकनं छकः ओखरपौवाया स्थानीय जनताया विरोधं यानाः येँया फोहोर मुनेगु बन्द जूगु दु । थज्याःगु घटनाय् थन तःकः हे जुइधुंकल । ओखरपौवाया स्थानीय जनतां उगु लागाय् अस्पताल दयेका बी धकाः महानगरपालिकां याःगु बचं पूवंके माल धासें अन मनपाया फोहोर वाकेगु हे बन्द याना बिउगु खः ।

येँ देशय् थथे धुवांधू फोहोर मुनेज्याया लिउने ओखरपौवाया स्थानीय जनतां म्हिताच्वंगु भूमिका तसकं नकारात्मक जू । कांग्रेसया सरकार दुसा अन च्वंिपं एमाले कार्यकर्तातय्सं छु छु त्वहचिनाः फोहोर वायेगु बन्द याना बी । एमालेया सरकार दुसा अनया कांग्रेस कार्यकर्तां बन्द याना बी । आः एमाले व कांग्रेसया मंकाः सरकार दु याकनं हे माओवादीया कार्यकर्तां फाहोर वायेगु बन्द याना बीफु । अथे बन्द याईपंत सम्बद्ध पार्टीं छुं धाये फुगु नं मखु । उखे मनपां नं स्थानीय वासिन्दायात छु याना बी धकाः बचं बीगु खः व बचं पूवंकेगुपाखें छुं हे कुतः यानाच्वंगु खने मदु । स्थानीय जनतां न्ह्यागु धाःसां याना बी धकाः बचं बीगु तर ज्या धाःसा छुं नं याना मबीगु हिसि दुगु खँ मखु । थुिकं स्थानीय जनतायात झन जक आक्रोशित याना बीगु निश्चित दु । यदि मनपायाके अस्पताल दयेकेगु हैसियत मदुसा दयेका बी धकाः छाय् सम्झौता यायेमाल सम्झौता याये धुंकाः कि थम्हं दयेका बी माल कि मखुसा सुनां दयेकेफु वयाथाय् वनाः इनाप यायेमाल । थम्हं दयेके मफुसा फुिपंथाय् वनाः आग्रह यायेगु ज्या ला मनपां यायेफुगु खः । तर अज्याःगु छुं नं याइ मखु । वास्तवय् मनपाया थज्याःगु प्रवृत्तिया कारणं नं ओखरपौवाया स्थानीय जनतायात फोहोर पनेगु अनावश्यक अवसर चूलानाच्वंगु खः ।

More Stories Like this