राष्ट्रपति यादव कतार प्रस्थान
राष्ट्रपति डा. रामवरण यादव प्यन्हुन्यंकया राजकीय भ्रमणया निंतिं थौं कतार प्रस्थान यानादीगु दु ।
कतारया अमिर हमाद बिन खलिफाया मैत्रीपूर्ण ब्वनाय् राष्ट्रपति यादव सोमवाः उखे पाखे प्रस्थान यानादीगु खः । राष्ट्रपति यादव झिंन्याम्हेसिया पुचःया नेतृत्व यानादिसें सोमवाः सुथय् कतार झायादीगु खः ।
भ्रमण दलय् भौतिक योजना तथा निर्माण मन्त्री हृदयेश त्रिपाठी, राष्ट्रपतिया प्रेस सल्लाहकार राजेन्द्र दाहाल, राष्ट्रपति ज्याकूया सचिव वामनप्रसाद न्यौपाने, कयाम मुकायम परराष्ट्र सचिव दुर्गाप्रसाद भट्टराई लागयत अधिकारीतय् ब्वति दु ।
राष्ट्रपति यादव कतार प्रस्थान याये न्ह्यः वय्कःयात बिढाई यायेत त्रिभुवन अन्तर्राष्ट्रिय विमानस्थलय् उपराष्ट्रपति परमानन्द झा, प्रधानमन्त्री डा. बाबुराम भट्टराई, सभामुख सुभाषचन्द्र नेम्वाङ, उपप्रधानमन्त्री विजयकुमार गच्छदार व नारायणकाजी श्रेष्ठ 'प्रकाश' लगायत मन्त्री, सचिव, सुरक्षा निकायया प्रमुख नापं विदेशी कुटनीटिक नियोगया अधिकारीतय् ब्वति दुगु खः ।
