बन्द बारे अध्यक्षयात जानकारी
यें (सन्ध्या टाइम्स) / नेवाः स्वायत्त राज्य मंकाः संघर्ष समितिं थ्वहे वइगु जेठ १८ गते यायेत्यंगु नेपालमण्डल बन्द बारे सविधानसभाया अध्यक्ष सुभाष नेम्वाङ्गयात म्हिगः जानकारी याकेगु ज्या जुल । संघर्ष समितिया नायः हितमान शाक्यया नेतृत्वय् वंगु छगू पुचलं नेवाःतय् स्वायत्त राज्यया मागयात संविधान-सभां चिउताः मक्यंगुलिं जेठ १८ गते नेपालमण्डल बन्द यायेत्यनागु जानकारी नेम्बाङ्गयात बिउगु खः ।
लिसें प्रतिनिधि मण्डलं सरकारं हयेत्यंगु शहरीकरण विधयेकय् नेवाःतय्त निषेध यायेत्यंगुलिं अज्याःगु विधयेक लित कायेमाः धासें थ्व आन्दोलन सरकारया उगु विधेयकया विरोधय् नं केन्द्रित जुइगु जानकारी याःगु खः । लिसलय् अध्यक्ष नेम्बाङ्गं संविधान च्वयेगु ज्याय् नेवाःतय्सं क्यनाच्वंगु सरोकार सकारात्मक जू धासें शहरीकरण विधेयक बारे सम्बन्धित समितिया ध्यानाकर्षण यायेगु बचं बियादिल। प्रतिनिधिमण्डलय् सभासद्पिं डा. मंगलसिद्धि मानन्धर बुद्ध साय्मि तीर्थराम डंगोल दिलिप महर्जन राजकाजी महर्जन व उमा कपाली नं दी । लिसें नेवाः देय् दबू नेवाः राष्ट्रिय मुक्ति मोर्चा लोकतान्त्रिक नेवाः संघ ज्यापु महागुथि ज्यापु समाजया प्रतिनिधि नं दुथ्याःगु खः ।
