मोहनी सिधयेवं हे सेना समायोजन प्रकृया क्वचाइ : अर्थमन्त्री
अर्थमन्त्री वर्षमान पुन 'अनन्तं' मोहनी सिधयेवं हे सेना समायोजन प्रकृया क्वचाइगु संभावना अप्वःगु धयादीगु दु ।
मोहनीया लसताय् थःगु गृहजिल्ला रोल्पा थ्यंकादीम्ह मन्त्री पुनं स्थानीय संचाःकःपिंनापया खँल्हाबल्हाय् कांग्रेस, एमाले व मधेसवादी दलनाप मोडालिटी, ल्याः व प्याकेजय् वनीपिनिगु बारे सहमति जुइधुंकूगु धयादिसें मोहनी सिधयेवं रिग्रुपिङ्ग यायेगु तयारी जूगु नं जानकारी बियादिल । न्ह्यद्वः निसें च्याद्वः लडाकु नेपाली सेनाय् समायोजन यायेगु सहमति जूगु खुलासा यानादिसें मन्त्री पुनं पुनस्थापनाय् वनीपिं लडाकुतय्त न्हय्गु लख निसें झिगू लख तक राहत बीगु तयारी जुइधुंकूगु नं जानकारी बियादिल ।
माओवादी स्थायी समिति दुजः समेत जुयादीम्ह मन्त्री पुनं समायोजनय् वनीपिं लडाकुतय्गु वैवाहिक अवस्था, दँ व शैक्षिक अवस्था व स्वैच्छिक अवकाशया बारे नं दलत सहमति न्ह्यःने थ्यनेधुंकूगु धयादिल । मेगु छगू फरक प्रसङ्गय् मन्त्री पुनं पार्टी दुने अन्तरविरोध दुगु स्वीकार यानादिसें पार्टी धाःसा तमज्याइगु धयादिल । छम्हनिम्ह नेताया ययेवंतुं पार्टी तमज्याइगु वय्कःया धापू खः । संविधान दयेकेगु सेना समायोजन शान्ति आर्थिक सामाजिक रुपान्तरण व द्वन्द्वया इलय् घाःपाः जूपिं सहिद परिवार व अपाङ्गतय्त राहत बीगु लगायत विषय हे सरकारया मू ज्या जूगु धयादिल ।
वर्तमान सरकारं हे संविधान दयेका न्हूगु निर्वाचन याकीगु दाबी यानादिसें मन्त्री पुनं बाबुराम भट्टराई नेतृत्वया सरकार असफल जूसा लिपा दयेकीगु छुं नं सरकारं शान्ति व संविधानयात तार्किक निष्कर्षय् थ्यंके मफइगु ठोकुवा यानादिल ।
