प्रम डा. भट्टराईं ज्याथःजिथिपिंत नसाः ज्वलं व वसः इनाबिल
प्रधानमन्त्री डा.बाबुराम भट्टराई मोहनीया लसताय् म्हिगः चालं खुन्हु पशुपतिया समाजकल्याण केन्द्रय च्वंपिं ज्याथःजिथिपिंत नापलाना ब्लाङ्केत व हर्लिक्स इनाब्यूगु दु ।
थःजहान हिसिला यमि व सरकारी कर्मचारी नापं म्हिगःसुथय् पशुपति थ्यंकादीम्ह प्रधानमन्त्री डा. भट्टराईं ज्याथःजिथिपिं निसः व सुइम्हेसित नसाः ज्वलं व वसः इनाब्यूगु खः । देय्या प्रधानमन्त्रीं थःपिंत नापलाःवःगु सियाः ज्याथःजिथिपिं नं तसकं लय्ताःगु खः । वय्कःपिंसं प्रधानमन्त्री डा. भट्टराईयात सुवाः तकं ब्यूगु खः । थ्वहे झ्वलय् ज्याथःजिथिपिंसं प्रधानमन्त्री डा.भट्टराईयात थःपिनिगु आश्रम जिर्ण जुजुं वनाच्वंगुलिं थ्वयात ल्ह्वनादीत इनाप यानादिल । उघ्रिमय् ज्याथःजिथिपिनि न्ह्यःने हे डा. भट्टराईं समाजकल्याण केन्द्र ल्ह्वनेगु ज्या न्ह्याकेत उजं नं बियादिल ।
थ्व स्वयां न्ह्यः प्रधानमन्त्री डा.भट्टराईं माइती नेपालं उद्धार याना संरक्षणय् तयातःपिं मी धुंकूपिं मिसा व मस्तय्त नाप लायेत झायादीगु खः । अन वय्कलं थः पवित्र तिर्थस्थलय् वनागु थें जूगु अनुभव कनादिल । वय्कलं नेपाःया मिस्त मीयंकीपिं मानव अवतार कयाः बूपिं पशुत जूगु धयादिल । थःपिं जीवनभर अन्याय अत्याचारविरुद्ध ल्वानागु न्ह्यथनादिसें वय्कलं मिसात मीपिंथें जाःगु जघन्य अपराधया विरुद्ध थः न्ह्याबलें दनेगु प्रतिबद्धता प्वंकादिल । थःम्हेसिनं न्हापायापिं नेतातय्सं थें फताह खँ मल्हायेगु धयादिसें छन्हुं हे विकृतिया अन्त मजूसां सरकारं थुकिया सुरु यानागु धयादिल ।
