न्हापांगु निर्णय हे विवादास्पद
यें (सन्ध्या टाइम्स) / न्हूम्ह प्रधानमन्त्रीं सपथ ग्रहण यायेसातकि हे मन्त्रिपरिषद्या बैठक च्वनाः छगू निर्णय यायेमाःगु चलन दु गुगु न्हूगु सरकारया न्हापांगु निर्णय जुइ । तर माधव नेपालया सरकारं याःगु न्हापांगु निर्णय हे विवादय् लाःगु दु ।
म्हिगः स्वम्ह सदस्यीय मन्त्रिमण्डलया न्हापांगु बैठकं येँया रत्नपार्कयात गणतन्त्र पार्क दयेकेगु व अन सहिदपिनि छगू तःधंगु स्तम्भ तयेगु धकाः निर्णय याःगु खः । जेठ १५ गते प्रधानमन्त्री नेपालपाखें उगु स्तम्भया शिलान्यास याइगु ज्याझ्वः दु । तर रत्नपार्कयात 'शंखधर पार्क' दयेकेगु धकाः धाःसा एमालेपाखें न्हापा हे निर्णय याना तयेधुंकूगु दु । नेपाल संवत् ११२९ न्हूदँया लसताय् एमालेया न्हूदँ समारोह समितिया ग्वसालय् तत्कालिन उपप्रधानमन्त्री व एमाले नेता वामदेव गौतम नापं पद्मरत्न तुलाधरया ल्हातिं उकिया शिलान्यास नं जुइधुंकूगु खः । तर आः वयाः एमालेया हे न्हू वःगु सरकारं शंखधर पार्कया पलेसा गणतन्त्र पार्क दयेकेगु निर्णय याःगु दु ।
