थौं चालं
थौं कौलाथ्व दशमि अर्थात चालं । मोहनी नखःया मू न्हि । म्हिगः थापं याःगु ज्याभःयात थौं पुजायाना क्वकाइगु खः । थनिंनिंसें थःसिबें थकालिपिनिपाखें मोहनी सिन्हःतिना आसिस कायेगु चलन नं दु ।
थ्वहे दथुई मोहनीया लसताय् राष्ट्रपति डा.रामबरण यादवं सकल नेपाःमिपिंत भिंतुना देछानादीगु दु । छगू विज्ञप्ति पिथना वय्कलं नेपाः शान्ति व संविधानया लँपुई न्ह्याःवनाच्वंगु इलय् जनताया थ्व इच्छायात ताः लाकेत सकल राजनीतिक दलतय्त इनाप नं यानादीगु दु । मोहनीया लसताय् राष्ट्रपति यादवं थौं न्हिनसिया झिंनितात्याः इलंनिसें सनिलया न्याताः ई तक सर्वसाधारण जनतायात सिन्हःतिकीगु ज्याझ्वः दुगु राष्ट्रपति ज्याकुथिं जानकारी ब्यूगु दु । अथेहे एकिकृत माओवादीं, नेपाली कांग्रेस, नेकपा एमाले लगायत थीथी राजनीतिक दलतय्सं नं विज्ञप्ति पिथना सकल नेपाःमिपिंत मोहनीया भिंतुना देछाःगु दु ।
