मधेसयात भड्के यानाः देशय् अराजकता मन्यंकेत गृहमन्त्री गच्छेदारया ख्याच्वः
उपप्रधान नापं गृहमन्त्री विजयकुमार गच्छदारं नेकपा एमालेया नायः झलनाथ खनाल व एकिकृत नेकपा माओवादीया न्वकू मोहन वैद्यं मधेशयात भड्के यानाः अराजकता न्यंकेत स्वःगु द्वपं बियादीगु दु ।
विराटनगरय् मंगलवाः संचारकःमितलिसे खँल्हानादिसें मन्त्री गच्छदारं प्यंगू बुँदाया सहमतियात राष्ट्रघातीया द्वपं बियाः एमाले नायः खनाल व माओवादी नेता वैद्यं मधेश व मधेसीया भावनाय् घाः लाकेगु ज्या याःगु दावी नं यानादिल । वय्कलं प्यंगू बुँदाया सहमति राष्ट्रघाती मजूगु खँ लिसा कयादिसें सत्ताय् वनेमखंगु तमय् अजाःगु उत्तेजक अभिव्यक्ति मबीत नं इनाप यानादिल । नापं मधेसयात तं चायेकाः राष्ट्रियताया रक्षा मजुइगु व मधेसी जनताया भावनाय् घाः लाकेगु कथंया अभिव्यक्ति मबीत नं इनाप यानादीगु खः ।
वय्कलं नेपाली सेनायात समावेशी दयेकेत झिद्वःम्ह मधेसी समुदायया ल्याय्म्हतय्त भर्ना यायेगु प्रकृया याकनं हे न्ह्याकेगु नं जानकारी बियादिल । मोहनीया दथुइ नं सरकारं दलीय सहमतिया निंतिं कुतः यानाच्वनेगु खँ धयादिसें मन्त्री गच्छदारं मोहनी क्वचायेवं शान्ति व संविधानया विवाद जुयाच्वंगु विषयस नं सहमति जुइगु दावी तकं यानादीगु खः ।
