एमाओवादीपाखें प्वंकूगु प्रतिबद्धतायात विश्वास यायेत कांग्रेस सभापति कोइरालाया इनाप
नेपाली कांग्रेसया सभापति सुशील कोइरालां शान्ति प्रकृयायात कयाः एकीकृत नेकपा माओवादीपाखें प्वंकूगु प्रतिबद्धतायात सकस्यां विश्वास यायेमाःगु धयादिल ।
मोहनी, स्वन्ति व छठ पर्वया झ्वलय् नेपाल पत्रकार महासंघ बाँके शाखां याःगु तुच्चा ज्याझ्वलय् न्ववानादिसें वय्कलं उगु खँ धयादीगु खः ।
सभापति कोइरालां माओवादी नायः पुष्पकमल दाहाल प्रचण्ड व प्रधानमन्त्री डा. बाबुराम भट्टराई शान्ति व संविधानयात कयाः तसकं गम्भिर जूगु धयादिल । मोहनी, स्वन्ति सिधयेवं शान्ति प्रकृयां गति काइगु नं सभापति कोइरालां विश्वास प्वंकादीगु खः ।
वय्कलं माओवादी नायः प्रचण्डं शान्ति प्रकृया पूवंकेत इमान्दारीपूर्वक प्रतिबद्धता प्वंकादीगु खँ धयादिसें माओवादीयात न्ह्याबलें अविश्वास यानाच्वने मजिउगु खँ धयादिल । थः नेपालगंज वयेन्ह्यः नायः प्रचण्डलिसे नापलानागु झ्वलय् सकारात्मक खँल्हाबँल्हा जूगु नं जानकारी बियादीगु खः । दलत फुक्क जानाः न्ह्याःवंसा शान्ति व संविधानया विवाद जुयाच्वंगु विषयत याकनं हे ज्यंकेफइगु वय्कःया धापू खः ।
