थी थी थासय् दुर्घटना जुयाः निम्ह सित, निगू दर्जन मनूत घाःपाः
पूर्वी चितवनया भण्डारापाखें नारायणगढ वनाच्वंगु माइक्रोबस दुर्घटना जुया उकिइ च्वनावंपिं झिंगुम्ह मनूत घाःपाः जूगु दु ।
ना २ ख ९४७४ नम्बरया माइक्रोबस टिकौली जंगलय् दुर्घटना जूगु चितवन प्रहरीं न्ह्यथंगु दु । घाःपाः जूपिंमध्ये गीतानगर २ या न्यय्च्यादँ दुम्ह अम्बिका घिमिरेया अवस्था चिन्ताजनक दुगु खँ धाःगु दु । घाःपाः जूपिन्त भरतपुरय् च्वंगु चितवन मेडिकल कलेजय् वासः जुयाच्वंगु दु । माइक्रोबस तसकं ब्वाकाहःगुलिं दुर्घटना जूगु प्रहरीं न्ह्यथंगु दु ।
अथेहे नेपालगंज कोहलपुर सतकखण्ड अन्तरगत बाँकेया कारकाँदोय् मंगलवाः सुथय् सशस्त्र प्रहरीया गाडी व नीजि जिप ल्वाःना जूगु दुर्घटनाय् छम्ह मनू सीगु दुसां न्हय्म्ह घाःपाः जूगु दु ।
उगु दुर्घटनाय् बाँके बनकटुवा ९ सम्झनाचोकया नीन्यादँ दुम्ह रेशम खत्री सीगु खः । घाःपाः जूपिन्त भेरी अस्पताल व शिक्षण अस्पताल कोहलपुरय् वासः जुयाच्वंगु दु । नेपालगंजपाखें कोहलपुर वयाच्वंगु सशस्त्र प्रहरीया बा १ झ ६९३१ नम्बरया गाडि व कोहलपुरपाखें बागेश्वरी द्यःया दर्शन यायेत वनाच्वंगु जीप ल्वाःगु खः ।
उखे सर्लाहीया नवलपुरय् छगः यात्रु बसं गोरु गाढायात ठक्कर नकूगु इलय् शासाफर ४ या सघमलाल राय सीगु प्रहरीं न्ह्यथंगु दु । येँपाखें कटारी वनाच्वंगु ना ३ ख ७०६ नम्बरया बसं राययात पूर्व्रपश्चिम राजमार्ग नवलपुरय् ठक्कर नकूगु खः । उगु ठक्करपाखें घाःपाः जूम्ह राययात वासः यायेगु झ्वलय् सीगु खः । ठक्कर नकूगु बस व चालकयात नियन्त्रणय् कायेधुंकूगु जिल्ला ट्राफिक प्रहरी ज्याकू सिरहां न्ह्यथंगु दु ।
