सेनाय् नेवाःतय्गु नं ब्यागलं हे गणया माग
नेवाः स्वायत्त राज्यया निंतिं संघर्ष याना वयाच्वंगु नेवाः स्वायत्त राज्य मंकाः संघर्ष समितिं नेपाःया सेनाय् नेवाःतय्गु नं ब्यागलं हे कथंया छगू गण दयेकेमाः धकाः माग याःगु दु ।
नेवाःतय्सं नेपाःया सेनाय् नेवाःत जक दुथ्याकेत ब्यागलं गण दयेकेमाः धकाः माग याःगु थ्वहे न्हापांखुसी खः । म्हिगः सोमवाः संघर्ष समितिया मुँज्या च्वनेधुंकाः समितिया नायः नरेश ताम्रकारं पिथनादीगु प्रेस विज्ञप्ती नेवाः गणया माग यानातःगु खः ।
अथेहे उगु विज्ञप्ती रक्षा मन्त्री शरत सिंह भण्डारीं लिपांगु इलय् गुगु कथं तराईया नीनिगू जिल्लायात नेपालं ब्यागलं तयेगु धकाः अभिब्यक्ति बिउगु खः, उकियात कयाः थःपिनिगु नं ध्यानाकर्षण जूगु धासें राष्ट्र बिखण्डन याइगु छुं नं कथंया ज्यायात नेवाःतय्सं समर्थन यायेफइमखु धकाः स्पष्ट यानातःगु दु ।
थ्वहे झ्वलय् संघर्ष समितिं नेवाः स्वायत्त राज्यया सः थ्वयेकाः नेपाल संवत ११३२ न्हूदँया लसताय् छगू तुच्चा ज्याझ्वः यायेगु नं क्वःछिउगु दु । उगु मुँज्याय् नेवाः स्वायत्त राज्यया नितिं नेवाःतय्त संगठित यानाः सघर्षया ज्याझ्वः न्ह्याकाः यंकेगु विषययात कयाः नं सहलह जूगु खँ धाःगु दु ।
