युरोपेली राजदूततय्सं प्रधानमन्त्री नापलात
युरोपेली देया राजदुततय्सं प्यन्हु न्ह्यः तिनि प्रधानमन्त्री जुयादिम्ह माधवकुमार नेपालयात नापलाना खँल्हाबंला या:गु दु ।
मंगलवाः सुथय् प्रधानमन्त्रीया निजी निवास कोटेश्वरय् वनाः नेपाः स्थित युरोपेली देया राजदूततय्सं प्रधानमन्त्रीयात नापलानादीगु खः । प्रधानमन्त्री नापया खँल्हाबंलाय् युरोपेली देयतय्सं नेपाःया शान्ति प्रकृया व संविधान निर्माणया निंतिं ग्वहालि यायेगु प्रतिवद्धता प्वंकूगु दु ।
बेलायत, फिनल्याण्ड लगायत खुगू युरोपेली देया राजदूततय्सं माओवादी शिविरय् च्वंपिं लडाकूतय्त तत्काल पुर्नस्थापना यायेमाःगु खँय् बः ब्यूगु खः । पुर्नस्थापनाया निंतिं आवश्यक प्याकेज देयेका ग्वहालि यायेत थःपिं तयार दुगु खँ राजदूततय्सं धाःगु प्रधानमन्त्रीया विदेश मामिला सल्लाहकार राजन भट्टराईं जानकारी बियादिल । अथेहे नेपाल विकास मंचय बैठक नं याकनं यायेत प्रधानमन्त्री समक्ष राजदूततय्सं इनाप याःगु खः ।
प्रधानमन्त्री नेपालं शान्ति सुरक्षा व नागरिक सर्वोच्चताया खँ सुंनाप नं सम्झौता मयायेगु धासें ग्वहालिया निंतिं राजदूततय्त इनाप यानादिल ।
