संविधानसभाया बैठकय् राष्ट्रिय संरक्षण समितिया प्रारम्भिक प्रतिवेदन पेश
संविधान सभाया नीच्याक्वःगु बैठकय् राष्ट्रिय हित संरक्षण समितिया सभापति अमिक शेरचनं समितिया अवधारणा पौ नापं प्रारम्भिक मस्यौदाय प्रतिवेदन-२०६६ व अजधारणा पौलय् आधारित व्याख्यात्मक टिप्पणी सहितया प्रारम्भिक मस्यौदा प्रतिवेदन-२०६६ न्ह्यब्वयादीगु दु ।
थौं निन्हय् च्वंगु बैठकय् समितिया सभापित शेरचनं थ्व प्रतिवेदन पेश यानादीगु खः । थुकीया बारे जेठ १३, १७ व १९ गते सहलह याइगु ज्याझ्व दु । समितिया थ्व अवधारणाय् धासाः नेपाली कांग्रेसं असहमति प्वंकूगु दु ।
कांग्रेसं प्रतिवेदनया बुँदा नं ५या धारा-३य् न्ह्थंनातः कथं झिंच्यादँ थ्यंपिं नागरिकतय्त सैन्य तालिम बीगु प्रति असहमति प्वंकूगु दु । अथेहे बुँदा नं २३या धारा-२लय् न्ह्यथंनातःगु 'जनमुक्ति सेना' खँग्व प्रति नं असहमति प्वंकूगु दु । न्ह्यगू दल व माओवादी दथुइ जूगु झिंनिगू बुँदे सहमति व बृहत शान्ति सम्झौताय् 'जनमुक्ति सेना' धाःगु खँग्वः मदुगु धासें कांग्रेसया सभासदत नारायण खड्का व जगदीशनरिसंह केसीं असहमति प्वंकूगु खः । अथेहे मस्योदाय् न्ह्यथंनातःगु संघीयता बारे जनमोर्चा नेपालया रश्मिराज नेपालीं विरोध याःगु दु ।
संविधानसभाया मेगू बैठक बुधवाः च्वनी ।
