येँया जामे मस्जिद न्ह्यःने कयेकल न्हिनय् हे गोली
येँया तसकं व्यस्त थाय् त्रि-चन्द्र क्याम्पस न्ह्यःनेसं च्वंगु जामे मस्जिद लिक्क इस्लामिक संघया मू छ्याञ्जे फैजद अहमदयात थौं न्हिनय् हे गोलीं कयेकाः स्यानाब्यूगु दु ।
सुनसरी भोक्राहासं छेँय् दुम्ह अहम्मदयात जामे मस्जिदय् न्हिनसिया प्रार्थना क्वचायेकाः ज्याकूपाखें लिहा वनाच्वंगु इलय् जःछिपा निताः इलय् गोली कयेकूगु खः । गोली लानाः बांमलाक्क घाःपाः जूम्ह अहमदयात वासःया नितिं याकनं वीर अस्पताल थ्यंकूगु खः ।
अस्पतालय् वासः यायेमखंक हे अहमद सीगु महानगरीय प्रहरी लागा हलुमान ध्वाखां जानकारी ब्यूगु खः । घटनास्थलपाखें न्यासः मिटर पश्चिम हलुमान ध्वाखा प्रहरी, झिगू मिटर जक ताःपाक्क महानगरीय प्रहरी आयुक्तया ज्याकू कमलपोखरी व नेपाली सेनाया मुख्यालय भद्रकाली थ्यंमथ्यं गुसः मिटर जक ताःपाःगु थाय् खः । सिंहदरबारपाखें थ्यंमथ्यं छगू किलो मिटर व नारायणहिति संग्रहालयपाखें न्यासः मिटर जक ताःपाःगु दूरीइ दुगु थ्व थाय् राजधानीया मुटु कथं कायेगु याः ।
प्रत्यक्षदर्शीया कथं स्वंगू राउण्ड गोली कयेकेधुंकाः गोली लाःम्ह अहमद तुरुन्त हे ग्वारातू वंगु खः । वंगु निदँ थुखे थीथी पेशाय् ज्या यानाः वयाच्वंम्ह मुसलमान समुदायया मनूत दथुइ गोलीं कयेकेगु घटनां उमिगु असुरक्षा अप्वयाः वनाच्वंगु दु ।
नेपालय् असुरक्षित दुपिं मुसलमानत मध्ये जामे मस्जिदय् प्रार्थना यायेत वनीपिं मुस्लिमत पाकिस्तानी राजदूतावासय् वनेत नापं ग्याः । पाकिस्तानी दूतावासय् वये वने यायेबलय् थःपिनिगु ज्यान खतराय् लाइगु धासें उपिं दूतावास वनेत नापं ग्यायेगु याः ।
