कांग्रेस व एमालें ग्वाहालि मब्यूसा सरकारं एकलौटी रुपं शान्ति प्रक्रिया : रक्षामन्त्री
रक्षामन्त्री शरदसिह भण्डारीं कांग्रेस व एमालें ग्वाहालि मब्यूसा सरकारं एकलौटी रुपं रिगु्रपिङ यानाः शान्ति प्रक्रिया न्ह्यःने न्ह्याकेगु दाबी यानादीगु दु । रिपोर्टर्स क्लब नेपालं थौं ग्वसाः ग्वःगु साक्षात्कारय् मन्त्री भण्डारीं धयादी - शान्ति प्रक्रियाय् माओवादी ईमान्दार जुयाः वःगुलिं थज्याःगु इलय् मेमेगु दलं माओवादीयात ग्वाहालि यायेमाः मखुसा सरकार एकलौटी रुपं न्ह्यःने न्ह्याइ ।
मन्त्री भण्डारीं शान्ति प्रक्रियाय् विवादास्पद विषयसं सहमति जुइधुंकाः पीन्यान्हुयादुने शान्ति प्रक्रिया लिच्वलय् थ्यंकेगु सहमति जूगु धयादिसें सरकार नीस्वंगुया पीन्यान्हुं शान्ति प्रक्रिया लिच्वलय् थ्यंगु हुइना भुइना जक जूगु नापं स्पष्ट यानादिल ।
वय्कलं प्रधानमन्त्री स्वदेश लिहाँ झायेधुंकूगुलिं थुगु वाः हे सेना समायोजन विशेष समितिया बैठक च्वनाः रिगु्रपिङया ज्या न्ह्यःने न्ह्याकेमाःगु जानकारी बियादीगु दु । मन्त्री सिहं नेपाली सेनाया लोकतान्त्रिकीकरण जुइ हे मफइगु दाबी यानादिसें मधेसीयात दुथ्याकाः समावेशी दयेकेगु व सेना समायोजन यानाः देय्पाखें ल्वापु क्वचायेकेगु विषयलय् नेपाली सेना सकारात्मक दुगु जानकारी नं बियादीगु खः ।
वय्कलं माओवादी लडाकुयात तप्यंक हे नेपाली सेनाय् दुथ्याकेगु ज्या सम्भव मदुगु नापं स्पष्ट यानादीगु दु । रक्षामन्त्री शरतसिंह भण्डारीं नेपाली सेनाय् मधेशी मूलया युवापिनिगु मंकाः भर्ना प्रक्रियाया नितिं गृहकार्य न्ह्यायेधुंकूगु जानकारी बियादिसें नेपाली सेनाया मापदण्डया हे आधारय् मधेशी युवापिनिगु भर्ना याइगु स्पष्ट नापं यानादीगु खः । समावेशी दयेकेत नेपाली सेना नं सकारात्मक दुगु वय्कःया दाबी खः ।
राज्यया मेमेगु निकायया तुलनाय् नेपाली सेना समावेशी चरित्रया जुइमफूगु हुनिं सेनाय् मधेशी युवापिनिगु भर्ना माःगु रक्षामन्त्री भण्डारीया दाबी खः । वय्कलं एकीकृत नेकपा माओवादी व मधेशी मोर्चा दथुइ जूगु प्यंगू बुँदे सहमतिइ राष्ट्रघाती बुँदा क्यनेत दलतय्त हाथ्या बियादिसें राज्यया फुक्क निकाययात समावेशी यायेत जूगु सहमति राष्ट्रघाती जुइमफइगु दाबी यानादीगु दु ।
वय्कलं मधेशीत विभेदय् लानाः वयाच्वंगुलिं हाकनं नं विभेदय् लाकाः च्वनेगु खःसा मधेशया नीनिगू जिल्लां निर्णय यानाः नेपाःपाखें ब्यागलं जुइफूगु धयादीगु दु । वय्कलं धयादी - मधेशया नीनिगू जिल्लां ब्यागलं च्वनेगु निर्णय याःसा गुगु ऐन व कानुनं देय्यात बचय् याइ ?
वय्कलं संघीयताय् वनेधुंकाः मधेशय् दुपिं पहाडी मूलया नागरिकतय्त नं राज्यय् आरक्षणया ब्यवस्था याइगु नापं जानकारी बियादीगु खः ।
