ज्या यायेमफूगु खँ स्वीकार : कोइराला
नेपाली कांग्रेसया सभापति सुशील कोइरालां महाधिवेशन क्वचाःगु दच्छि दयेधुंकाः नं पार्टी दुनें हे ग्वाहालि मयाःगुलिं थःम्हेस्यां ज्या यायेमफूगु खँ स्वीकार यानादिल ।
कांग्रेसया नैकाप गां कमिटीं शनिवाः ग्वसाः ग्वःगु भिन्तुना कालबिल व तुच्चा ज्याझ्वलय् न्ववानादिसें सभापति कोइरालां वरिष्ठ नेता शेर बहादुर देउवायात लक्षित यानादिसें ज्याखँय् ग्वाहालि मयाःगु धकाः कुंखिउँगु खः । पार्टीया विधिविधान कथं हे याःगु भातृ संगठनत विघटनया क्वःछिनाय् हाकनं विचाः यायेमफइगु खँ धयादिल ।
"क्वःमछिउसा असक्षम धकाः द्वपं बी, क्वःछिउसा पार्टी दुनें हे ग्वाहालि जुइमखु" सभापति कोइरालां धयादिल ।
अथेहे ज्याझ्वलय् न्ववानादिसें महामन्त्री प्रकाशमान सिंहं सुंयात नं लय्तायेकेत मखु पार्टी हीतया नितिं जूगु भातृ संस्थाया विघटनया क्वःछिना हिलेमफइगु स्पष्ट यानादिल ।
