शान्ति प्रकृयायात निष्कर्षय् थ्यंकीगु खँय् आशंका
नेकपा एमाले नायः झलनाथ खनालं आःया सरकारं शान्ति प्रकृयायात निष्कर्षय् थ्यंकीगु खँय् आशंका यानादिल ।
एमाले म्याग्दी जिल्ला परिषदया शनिवाः बेनीइ उलेज्या यानादिसे नायः खनालं प्रधानमन्त्री डा. बाबुराम भट्टराईयात थःगु पार्टी दुने हे ग्वाहालि मजुयावंगु धासें शान्ति प्रकृया निष्कर्षय् थ्यनीगु खँय् शंका व्यक्त यानादीगु खः ।
वय्कलं शान्ति प्रकृया निष्कर्षय् थ्यंकीगु व संविधान दयेकेगु ज्याय् सरकारं हःगु ज्याझ्वलय् थःपिन्सं रचनात्मक ग्वाहालि याःसां पार्टी दुनें हे प्रधानमन्त्रीयात ग्वाहाली मयाःगु खँ धयादिल ।
माओवादी पार्टी शान्ति व संविधानयात कयाः अझ नं जिम्मेवार जुइमफूगु द्वपं बियादिसें नायः खनालं शान्ति प्रकृया निष्कर्षय् थ्यंकेगु नितिं राष्ट्रिय सहमतिया विकल्प मदुगु खँ लिसा कयाः धयादिल । वय्कलं शान्ति व संविधान एमालेया अभियान धइगु नारा ज्वनाः एमाले देय्न्यंक अभियान न्ह्याकेगु तयारी यानाच्वंगु जानकारी नं बियादिल ।
