प्रधानमन्त्री डा. भट्टराई व सिंह दथुइ खँल्हाबँल्हा
प्रधानमन्त्री डा. बाबुराम भट्टराई व भारतीय प्रधानमन्त्री डा. मनमोहन सिंह दथुइ न्यूयोर्कय् नापलानाः सहलह यानादिल । राष्ट्रसंघया महासभाय् ब्वति कायेत न्यूयोर्कय् च्वनादीपिं प्रधानमन्त्री डा. भट्टराई व सिंह दथुइ नापलानाः खँल्हाबँल्हा यानादीगु खः ।
नापलायेगु झ्वलय् भारतीय प्रधानमन्त्री सिंहं डां भट्टराईया कार्यकालय् शान्ति व संविधानया ज्या पूवनीगु विश्वास प्वंकादिसें प्रधानमन्त्रीइ निर्वाचित जुयादीगुलिं भिन्तुना बी नं ल्वमंकामदी । वय्कलं नेपाःया शान्ति प्रकृया व संविधान दयेकेगु ज्याय् भारतया पूवंक हे ग्वाहालि दइगु खँ धयादिल ।
भारतीय प्रधानमन्त्री सिंहं नेपाः व भारत दथुइ दयाच्वंगु दक्व कथंया असहमति वार्ताया माध्यमपाखें सकारात्मक कथं ज्यंकेमाःगु धयादिसें वइगु महिनाय् भारत भ्रमणया नितिं ब्वनादीगु खः ।
खँल्हाबँल्हाया झ्वलय् प्रधानमन्त्री डा. भट्टराईं माओवादी नेतातय्त पटना अदालतं न्यंकूगु कैद व जरिवानाया फैसलायात कयाः चिउताः प्वंकादीगु खः । लिसलय् भारतीय प्रधानमन्त्री सिंहं थुगु घटनायात थःम्हेस्यां गम्भिर कथं कयागु धासें उकियात भिंकेत कुतः यायेगु नं आश्वासन बियादीगु स्वकिय सचिव विश्वदीप पाण्डें जानकारी बियादीगु खः ।
