सभामुख नेम्वाङ्गं सरकारयात ध्यानआकर्षण
सभामुख सुवासचन्द्र नेम्वाङ्गं सरकारय् मिसातय्गु ल्याः स्वीस्वंगू प्रतिशत थ्यंकेत ध्यानआकर्षण याकादीगु दु ।
विहिवाः च्वंगु संसदया मुँज्याय् सभासदतय्सं सरकारय् समावेशी मजूगु सः ल्ह्वंगुलिं सभामुखं सरकारय् मिसातय्गु स्वीस्वंगू प्रतिशत ब्वति मदुगु बारे सरकारया ध्यानआकर्षण याकादीगु खः । नीनिम्ह दुजः दुगु वर्तमान सरकारय् छम्ह जक मिसाम्ह मन्त्री युवा नापं खेलकूद मन्त्री कमला रोका दुथ्यानाच्वंगु दु ।
सभामुख नेम्वाङ्गं संसदया वइगु मुँज्याय् छुं दिं न्ह्यः वःगु भुखाचंपाखें जूगु क्षतिया बारे जानकारी बीत नं सरकारयात उजं बिउगु दु ।
संसदय् न्ववानादीपिं अप्वः धइथें सांसदतय्सं भुखाचंपाखें जूगु क्षतिया विवरण मुंकेगु नापं पीडिततय्त राहत बीत सरकार गम्भिर मजूगु धासें सरकारया लिसः फ्वंगुलिं सभामुख नेम्वाङ्गं ध्यानआकर्षण याकूसें मेगु मुँज्याय् पूवंक विवरण बीत सरकारयात इनाप यानादीगु खः ।
