नेकपा माओवादी स्वंगू टुक्रा
मातृका यादव संयोजक जुयादीगु पुनर्गठित नेकपा माओवादी स्वंगू टुक्रा जूगु दु । माओवादीपाखें दीलिप शाह व भरत दाहालया नेतृत्वय् निगू पुचः अलग्ग जूगु दु ।
माओवादी प्रंवक्ता भरत दाहाललिसेया केन्द्रीय नेतातय्सं विहिवाः येँय् संयोजक यादवयात पार्टीपाखें निष्काशन यायेगु घोषणा याःगु खः । यादवं संगठनात्मक पद्दतिव नीति कथं ज्या मयाःगुलिं थःपिनिगु नेतृत्वय् पार्टी न्हूधाः जूगु दाहालं धयादीगु दु ।
दाहालं मातृका यादव निरंकुश व व्यक्तिवादी चिन्तन चरम अवस्थाय् थ्यंगु थःगु विश्वास दुपिन्त पार्टीया क्वःछिना अःखः रसिद मदयेकं हे ल्वाभः न्यायेगु धकाः तःधंगु ल्याखय् धेबाः म्हयेगु तर पार्टीइ धाःसा छुं नं हिसाव मक्यनेगु ज्या जूगु द्वपं बिउगु खः ।
थ्वहे झ्वलय् पुनर्गठित नेकपा माओवादीपाखें दीलिप शाहलिसॆया पुचः नं थ्यंमथ्यं अलग्ग जूगु दु । छगू हे कम्यूनिष्ट केन्द्र दयेकेगु धकाः शाह लिसेया पुचः माओवादीइ ल्वाकज्यायेगु तयारी जुयाच्वंगु दु । नापं उकिया नितिं माओवादीया नेतृत्वलिसे खँल्हाबँल्हा जुयाच्वंगु खँ सीदुगु दु ।
तत्कालिन नेकपा माओवादी व नेकपा एकता केन्द्र मसाल दथुइ पार्टी एकता जुयाः एकीकृत माओवादी जुइधुंकाः मातृका यादव व शाहं नेकपा माओवादीयात पुनर्गठन यानादीगु खः । अथेहे दाहालं मसालपाखें अलग्ग जुयाः न्हूगु पार्टी चायेकादीगु खः ।
