कांग्रेसय् संस्थापन व देउवा पक्ष थःथःगु हे अडान
भातृ संस्था विघटनया विवादय् लाःगु नेपाली कांग्रेसय् संस्थापन व देउवा निगुलिं पक्ष थःथःगु हे अडानय् च्वंगु दु । सभापति शुसील कोईरालां भातृ संगठन भंग यायेगु विषयलय् पार्टी बहुमतं याःगु निर्णय छु नं हालतय् लित मकाइगु धयादीगु दु ।
देउवा पक्षं क्वःछिना लित कायेत इनाप यानाच्वंगु हे इलय् सभापति कोइरालाया अज्याःगु धापू पिने पिहांवःगु खः । पदावधी क्वचायेकाः निष्क्रिय दुगु भातृ संगठनत पार्टी केन्द्रीय समितिया न्यय्न्याम्ह दुजःपिनिगु समर्थनय् भंग याःगुलिं क्वःछिना लित मकायेगु कोईरालां दाबी यानादीगु खः ।
महाराजगाजय् च्वंगु थःगु हे छेँय् साचारकःमिपिंलिसे खँल्हानादिसें सभापति कोईरालां पार्टीं याःगु क्वःछिना छु नं हालतय् लित मकायेगु जूगुलिं फुक्कसित सहमतिइ वयेत इनाप नापं याःगु खः ।
वय्कलं पार्टी विधान कथं भातृ संस्था भंग यायेगु ज्या जूगुलिं अनसनय् च्वनाच्वंपिंत अनसन त्वःतेत नं इनाप यानादीगु दु । भातृ संस्था भंग यायेगु निर्णयपाखें असन्तुष्ट जुयादीम्ह वरिष्ठ नेता देउवालिसे च्वनाः सहलह यायेत थः तयार दुगु धयादिसें कोईरालां पार्टीयात छधी दयेकाः यंकेगु धयादीगु खः ।
देउवा पक्षं धाःसा सभापितं याःगु निर्णय थःपिंत मान्य मजुइगु धयादिसें पुलांगु हे समितियात ग्वाहालि यायेगु धयाः वयाच्वंगु दु ।
