थ्वहे सरकारयात राष्ट्रिय सहमतिया सरकारया स्वरुप बिइत इनाप
उपप्रधान लिसे गृहमन्त्री विजयकुमार गच्छदारं शान्ति प्रक्रियाय् याकनं हे ठोस प्रगति जुइगु दाबी यानादीगु दु । सरकार शान्ति प्रक्रिया पूवंकेगु ज्या न्ह्यःज्यानाच्वंगु धयादिसें वय्कलं छुं ईदुने उकिया लिच्वः खनेदइगु न्ह्यःथनादीगु दु ।
अन्तर्राष्ट्रिय शान्ति दिवसया लसताय् शान्ति लिसे पुनःनिर्माण मन्त्रालयं थौं सिंहदरबारय् याःगु ज्याझ्वलय् मन्त्री गच्छदारं शान्ति प्रक्रियाय् ग्वाहालि यायेत फुक्कसित इनाप नापं यानादीगु खः ।
कार्यबाहक प्रधानमन्त्री नापं जुयाच्वनादीम्ह गच्छदारं शान्ति प्रक्रियायात तार्किक निष्कर्षय् थ्यंकाः इलय् हे संविधान पिहांवइगु प्रतिबद्धता व्यबहारिक रुपय् हे न्ह्यःने यंकेमाःगु धयादीगु खः ।
सशस्त्र ल्वापुया इलय् ध्वस्त जूगु भौतिक संरचना निर्माण जुयाच्वंगु न्ह्यःथनादिसें ल्यं दनीगु संरचनात निर्माण यानाः यंकेगु धयादीगु दु । जनयुद्धया इलय् कब्जा यानातःगु छेँ, बुँ लित बिइगु ज्या न्ह्यःने न्ह्याःगु धयादिसें वय्कलं कार्यान्वयनय् समस्या वःसा आयोग दयेकाः ज्यंकीगु नं स्पष्ट यानादिल ।
ज्याझ्वलय् पूर्वसभामुख दमननाथ ढुङ्गानां शान्ति व संविधानयात लिच्वलय् थ्यंकेगु नितिं फुक्क राजनीतिक पार्टीं वर्तमान सरकारयात ग्वाहालि यायेमाःगु धयादीगु दु ।
वर्तमान सरकारं शान्ति प्रक्रियायात निष्कर्षय् थ्यंकेमफूसा शान्ति सम्झौता हे संकटय् लाइगु धयादिसें वय्कलं कांग्रेस एमाले लगायतया दलतय्त सरकारय् ब्वति कायेकाः थ्वहे सरकारयात राष्ट्रिय सहमतिया सरकारया स्वरुप बिइत इनाप यानादीगु खः ।
