नेपाःयात सिक्किमीकरण यायेत स्वःगु द्वपं
एकिकृत नेकपा माओवादीया वैद्य पक्षं सरकारय् वनेत पार्टी नेतृत्वं संयुक्त लोकतान्त्रिक मधेसी मोर्चालिसे राष्ट्रिय स्वाधिनता विरोधी सहमति यानाः नेपाःयात सिक्किमीकरण यायेत स्वःगु द्वपं बिउगु दु ।
येँय् जूगु वैद्य पक्षया सेक्रेटरियतयागु अन्तरकि्रयात्मक राष्ट्रिय भेलां नेपालयात सिक्किमीकरण यायेगु षडयन्त्र कथं नेतृत्वं मधेसी मोर्चालिसे प्यंगू बुँदाया सहमति याःगु निष्कर्ष पिकाःगु दु । नापं प्यंगू बुँदाया सहमति आत्माघाति जूगु धासें उकियात तत्काल खारेज यायेत नं माग याःगु दु ।
उगु भेलां डा. बाबुराम भट्टराई व प्रचण्डयात लेण्डुप दोर्जे धासें उमिसं नेपाःयात भारतय् बिलय याना छ्वयेत्यंगु धकाः गम्भिर द्वपं नं बिउगु दु ।
थ्वहे झ्वलय् थौं कन्हय् शिविरय् दुपिं दक्व झिंगुद्वःम्ह लडाकुत समायोजनया नितिं योग्य जूगु धासें स्वेच्छिक अवकास बाहेक मेपिं सकसितं समायोजन यायेमाःगु अडान न्ह्यब्वःगु खः ।
अथेहे उगु भेलां पार्टी न्वकू डा. बाबुराम भट्टराई नेतृत्वया वर्तमान सरकार लोकतन्त्रया पलिस्था लिपा दक्कलय् असमानुपातिक व असमावेशी जूगु निष्कर्ष तकं पिकाःगु दु । भेलाय् वरिष्ठ न्वकू वैद्यया नापनापं मू छ्यांजे रामबहादुर थापा बादल छ्यांजे सीपि गजुरेल स्थायी समितिया दुजः नेत्र विक्रम चन्द पम्फा भुसाल लिसेंया नेतातय्सं नेतृत्वलिसे असहमति प्वंकूगु खः ।
