भुखाचं सीपिनीगु छेँजःयात तत्काल राहत कथं नीन्याद्वः बिइगु
सरकारं भुखाचं सीपिनीगु छेँजःपिंत तत्काल राहत कथं नीन्याद्वः तका बिइगु जूगु दु । कार्यवाहक प्रधानमन्त्री विजयकुमार गच्छेदारया अध्यक्षताय् सोमवाः बहनी च्वंगु केन्द्रीय दैवी प्रकोप उद्दार समितिया मुँज्यां सीपिनिगु छेँजःपिंत छगू लखया ल्याखं थप आर्थिक ग्वाहालि याकेत प्रधानमन्त्री दैवी प्रकोप उद्धार कोषयात सिफारिस नापं इनाप यायेगु निर्णय याःगु दु ।
अथेहे घटनाय् लानाः गम्भीर घाःपाः जूपिंत निःशुल्क स्वास्थ्य उपचारया व्यवस्था यायेगु, क्षति जूगु सार्वजनिक नापं व्यक्तिगत सम्पतिया यथार्थ विवरण मुंकेत तत्काल कार्यटोली दयेकाः क्षतिया विवरण कायेगु व व्यक्तिगत सम्पत्तिया हकय् विद्यमान राहत मापदण्ड कथं घटनास्थलय् हे वनाः स्वन्हुया दुने राहत धेवा इनेगु निर्णय नं उगु मुँज्यां याःगु दु ।
राष्ट्रिय आपत्कालिन कार्यसञ्चालन केन्द्रय् गृह मन्त्रालयया सहसचिवया नेतृत्वय् गृह अन्तरगतया सुरक्षा निकायया प्रतिनीधि दुथ्याःगु कमाण्डपोष्ट तयाः उद्धार नापं राहतया समन्वय जुयाच्वंगु मन्त्रालयं न्ह्यथंगु दु ।
