थ्व सरकारया विकल्प मदु : उपराष्ट्रपति झा
उपराष्ट्रपति परमानन्द झां डा. बाबुराम भट्टराई नेतृत्वया वर्तमान सरकारया विकल्प मदुगु खँ धयादीगु दु । वय्कलं शान्ति व संविधानया निंतिं स्वदँ तक छुं यायेमफुगु कांग्रेस व एमाले असफल जुइधुंकूगुलिं वर्तमान सरकारया विकल्प मदुगु धयादिल ।
छगू ज्याझ्वःया उलेज्या यायेत सोमवाः पोखरा थ्यंकादीम्ह झां थ्वस्वयां न्ह्यःया समिकरणया सरकार असफल जुइधुंकूगुलिं माओवादी व मधेशवादी दलत दथुइया समिकरणया विकल्प मदुगु स्पष्ट यानादिल । वय्कलं वर्तमान सरकार अन्तिम विकल्प जूगुलिं न्हापाया सरकारं यायेमफुगु ज्या वर्तमान सरकारं यानाक्यनेमाःगु धयादिल ।
शान्ति व संविधान निर्माणय् रचनात्मक भूमिका म्हितेत कांग्रेस व एमाले असफल जूगु धयादिसें उपराष्ट्रति झां देय्या ठेक्का कांग्रेस व एमालेया जक मजूगु धासें आक्रोश प्वंकादिल ।
मंगलवाः सुरू जुइगु शान्ति, वातावरण व पर्यटन सम्मेलनया उलेज्या यायेत उपराष्ट्रपति झा सोमवाः पोखरा थ्यंकादीगु खः ।
