'प्रचण्ड नेपाः व भारत दथुइया स्वापु क्वातुइकेगु पक्षय्'
नेपाः भ्रमणय् दीम्ह भारतीय जनता पार्टीया नेता विजय जोलीं माओवादी नायः पुष्पकमल दाहाल 'प्रचण्ड' नेपाः व भारत दथुइ स्वापु क्वातुइकेगु पक्षय् दुगु खँ धयादीगु दु ।
रिपोटर्स क्लबं सोमवाः येँय् याःगु छगू साक्षात्कार ज्याझ्वलय् वय्कलं प्रचण्ड नापया खँल्हाबंलाय् वय्कलं नेपाः व भारत दथुइया स्वापु बांलेकेमाःगु बिचाः प्वंकूगु धयादिल । वय्कलं प्रचण्डं थः भारत विरोधी मजूगु स्पष्ट याःगु धयादिसें थःत भारत विरोधीया कथं प्रचार याःगु खँ नं न्ह्यथंगु धयादिल ।
नेपालय् सुयागु व गज्याःगु सरकार निर्माण यायेगु धइगु खँ नेपाःमितय् ल्हातय् दुगु धयादिसें जोलीं भारतं नेपाःया मामिलाय् हस्तक्षेप मयाइगु दावी यानादिल । वय्कलं नेपालय् याकनं शान्ति व संविधान निर्माण जुयाः विकास निर्माण जुइमाः धइगु पक्षय् भारत दुगु नं स्पष्ट यानादिल ।
वय्कलं थःगु भ्रमण व्यक्तिगत जूसां थःम्हं नेपाःया राष्ट्रपति, प्रधानमन्त्री लगायत नेतातय्त नापलानागु जानकारी नं बियादिल ।
