माओवादीया गैर जिम्मेवारया हुनिं देशय् राजनीतिक संकट अप्वयावंगु
नेपाली कांग्रेसया सभापति सुशील कोइरालां एकिकृत नेकपा माओवादीया गैर जिम्मेवार ब्यवहारया हुनिं देशय् राजनीतिक संकट अप्वयावंगु द्वपं बियादिल ।
कपिलवस्तुया सदरमुकाम तौलिहवाय् शनिवाः पत्रकारतलिसे खँल्हानादिसें सभापति कोइरालां माओवादी नेतातय्गु धायेगु व यायेगु खँय् फरक जूगु खँ धयादिल । नापं वय्कलं तःधंगु दलया नातां जिम्मेवार जुइत माओवादीयात इनाप नं यानादिल ।
वयकलं शान्ति प्रकृया निष्कर्षय् मथ्यंतलय् संविधान दयेकेगु प्रकृया न्ह्याके मबीगु खँ धयादिसें संविधानसभाया तंगु स्वलाया ई दुने नं संविधान दयेके मफूसा कांग्रेस ई तनेगु पक्षय् मच्वनीगु दावि नं यानादिल ।
सभापति कोइरालां माओवादीया प्रतिबद्धता यायेगु तर कार्यान्वयन मयायेगु चरित्रं देशय् संकट अप्वयावंगु धयादिल ।
