भातृ संगठन विघटन यायेगु प्रस्ताव अस्वीकार

नेपाली कांग्रेसया देउवा पक्षं प्यंगू भातृ संगठन विघटन यायेगु प्रस्ताव अस्वीकार याःगु दु । केन्द्रीय समितिया मुँज्याय् न्ह्यब्वयेगु नितिं रणनीति क्वःछिइत वरिष्ठ नेता शेर बहादुर देउवाया बुढानिलकण्ठय् च्वंगु छेँय् जूगु मुँज्यां भातृ संगठन विघटन यायेगु प्रस्ताव अस्वीकार यायेगु क्वःछिउगु खः ।

संस्थापन पक्षं भातृ संगठन विघटन यायेगु निर्णय याकेत स्वःसा केन्द्रीय समिति मुँज्या हे वहिष्कार यायेगु देउवा पक्षं क्वःछिउगु दु । भातृ संगठन विघटनया प्रस्ताव सभापति सुशील कोइराला व वरिष्ठ नेता देउवा दथुइ जूगु सहमति अःखः जूगु देउवा पक्षया धापू खः ।

महामन्त्री प्रकाशमान सिंहं म्याद फूगु भातृ संगठनत विघटन यायेगु प्रस्ताव न्ह्यब्वयादीगु खःसा देउवा पक्षं निर्वाचित कार्यसमितियात हे महाअधिवेशन योकमाःगु अडान कया वयाच्वंगु खः ।