सार्वजनिक संस्थानय् याइगु राजनीतिक नियुक्ति तत्काल दिकेत सरकारयात उजं
व्यवस्थापिका संसद अन्तरगतया सार्वजनिक लेखा समितीं सरकारया मातहतय् च्वंगु सार्वजनिक संस्थानय् याइगु राजनीतिक नियुक्ति तत्काल दिकेत सरकारयात उजं बिउगु दु ।
समितीं मापदण्ड दयेकाः खुल्ला प्रतिस्पर्धाया लिधंसाय् संस्थानतय्गु कार्यकारी प्रमुख लिसेया पदाधिकारीत नियुक्त यायेत उजं बिउगु खः । सिंहदरवारय् च्वंगु समितिया ज्याकुथिइ शनिवाः च्वंगु मुँज्यां मन्त्रीपरिषद ज्याकूया नापनापं अर्थ व उद्योग मन्त्रालययात थुकथं उजं बिउगु सभापति रामकृष्ण यादवं जानकारी बियादीगु खः ।
मुँज्यां व्यवस्थापकिय कमजोरीया हुनिं दुरावस्थाय् थ्यंगु संस्थानया प्रगति विवरण प्रत्येक झिंन्यान्हुइ समितिइ लःल्हायेत नं सम्बन्धित पक्षयात उजं बिउगु सभापति यादवं धयादिल । यादवया कथं मुँज्याय् उपस्थित जुयादीम्ह अर्थमन्त्री वर्षमान पुनं समितिया उजं पाय्छि जूगुलिं उकियात सरकारं गथे खः अथेहे नालेगु प्रतिबद्धता नं प्वंकादीगु खः ।
