'थःपिनिगु स्वार्थ स्वयां जनताया भाग्य निर्माण यायेगु ज्या यायेमाः'
एकीकृत नेकपा (माओवादी)या नायः पुष्पकमल दाहाल 'प्रचण्डं' राजनीतिक दलतय्सं थःपिनिगु निहीत स्वार्थ स्वयां जनताया भाग्य निर्माण यायेगु कथं ज्या यायेमाःगु बिचाः प्वंकादीगु दु । वय्कलं धयादिल, 'निहीत स्वार्थ त्वःताः छम्हेसिनं मेम्हेसित ग्वाहालि यानाः न्ह्यावनेमाः ।'
ज्यापु समाज यलया झिंच्याक्वःगु दँ मुँज्याय् न्ववानादिसें नायः प्रचण्डं शान्ति व संविधान निर्माणया ज्या लिप्पांगु व महत्वपूर्ण चरणय् थ्यंगु न्ह्यनादिसें आः नं थुगु भालाः पुवंके मफुसाः देय् तःधंगु भुमरीइ फसेजुइगु ख्याच्वः बियादिल ।
शान्ति व संविधानया परिक्षा पास यायेत राजनीतिक दलतय्स हातेमालो यानाः न्ह्याः वनेमाःगु खँय् बः बियादिसें प्रचण्डं उगु हे मञ्चय् दीम्ह कांग्रेस उपसभापति रामचन्द्र पौडेलं उगु भालाः पूवंकेत कांग्रेसं ग्वाहालि याइ धकाः बियादीगु बचंयात लसकुस यानादिल ।
माओवादी पार्टीं संघियताया निंतिं अप्व सः थ्वयेकूगु व सैधान्तिक रुपं नेवाः स्वायत्त राज्य घोषणा तकं यायेधुंकूगुलिं माओवादी उगु घोषणापाखें ल्यूने मवनीगु दावी प्रचण्डं यानादिल ।
यलया लाय्कुली शनिवाः जूगु ज्याझ्वलय् कांग्रेस उपसभापति पौडेलं पुलांगु सहमतित कार्यान्वयन यानाः न्ह्याः वनेत माओवादी तयार मजूगु द्वपं बियादिसें शान्ति प्रक्रिया व संविधान निर्माण प्रक्रियाय् माओवादी याकचाः न्ह्याः वनेत स्वःगु द्वपं बियादिल ।
म्हिग जूगु छगू ज्याझ्वलय् माओवादी नायः प्रचण्डं शान्ति प्रकिया व संविधान निर्माण प्रक्रिया पूवंकेत माओवादी याकचासां न्ह्यावनी धकाः अभिव्यक्ति बिउगु धयादिसें वय्कलं उगु ज्या पूवंकेत याकचाः मखसें सहमति यानाः वनेमाःगु धयादिल ।
अथेहे ज्याझ्वलय् नेकपा (एमाले)या नायः झलनाथ खनालं शान्ति व संविधानया ज्या क्वचायेकेत लिबायेधुंकल तर ई धाःसा क्वमचानीगुलिं याकन सहमति यानाः ज्या न्ह्याकेमाःगु धयादिल । 'देय्या स्वंगू तःधंगु दल मिलेजुइमाः' वय्कलं धयादिल, 'झी तज्यासाः देय् तज्याइ, उकिं फुक्कं मिलेजुइमाः ।'
उगु ज्याझ्वलय् यलय् छगू वृद्धाश्रम देय्केत यलया अस्तमान महर्जनं बागदोलय् च्वंगु थःगु छगू रोपनी व १३ आना जग्गा नापं न्यय्गू लख दां ग्वाहालि कथं ज्यापु समाजयात लःल्हाःगु खः । ज्याझ्वलय् महर्जन नापं थीथी व्यक्तित्वतय्त हनेज्या नापं याःगु खः ।
