राष्ट्रपतिपाखें प्रधानमन्त्री भट्टराईया प्रशंसा

राष्ट्रपति डा. रामवरण यादवं प्रधानमन्त्री डा. बाबुराम भट्टराई नं यानाच्वंगु ज्या सकारात्मक जूगु धयादिसें वय्कःया प्रशंसा यानादीगु दु ।

नियमित ब्रिफिङया निंतिं शनिवाः राष्ट्रपति भवन शितल निवास थ्यंकादीम्ह प्रधानमन्त्री भट्टराईयात राष्ट्रपति यादवं शान्ति व संविधान प्रक्रिया क्वचायेगु खँय् जनताया प्रधानमन्त्री प्रति अपेक्षा दुगु धयादिल । वय्कलं जनताया अज्याःगु अपेक्षा पूवंकेत मेमेगू राजनीतिक दलतय् साथ कयाः न्ह्याः वनेत नं प्रधानमन्त्रीयात इनाप यानादिल ।

उगु इलय् प्रधानमन्त्री भट्टराईं शान्ति व संविधान निर्माण प्रक्रियाय् सरकारं यानाच्वंगु ज्या व प्रगतिया बारे राष्ट्रपतियात जानकारी बियादीगु खः । अथेहे प्रधानमन्त्रीं संयुक्त राष्ट्रसंघया सभाय् ब्वति कायेत थः अमेरिका वनेत्यंगु बारे नं राष्ट्रपतियात जानकारी बियादीगु खः ।