बाबुराम भट्टराईया वोली

एकीकृत माओवादीया वरिष्ठ नेता डा. बाबुराम भट्टराईं सैनिक सर्वोच्चताया आधारसिलाय् दयेकूगु वर्तमान सरकार कठपुतली व सिखण्डी जूगु धयादिसें थुकियात ताःलाके मबीगु धयादीगु दु । जनक्रान्तिका घाःपाः व अपाङ्गतय्गु न्हापांगु सम्मेलनया निर्णय सार्वजनिक यायेत जनसंचार अभियानय् ग्वसाः ग्वःगु ज्याझ्वलय् न्वंवानादिसें नेता भट्टराईं प्रतिक्रान्तिया नमुनायारुपं वःगु थ्व सरकार शान्ति असफल जुयावनीगु व सैनिक तानाशाह लादय् यायेगु षड्यन्त्र जुयाच्वंगु नापं धयादीगु दु । प्रतिक्रान्तिया षड्यन्त्र व नाटकया पर्दात छगू धुंकाः मेगु यानाः चालाः वनीगु धयादिसें वय्कलं माओवादीं उत्तेजित मजूसे सदन व सतकपाखें शान्तिपूर्ण युद्धपाखें प्रतिक्रान्तियात असफल यायेगु नं धयादीगु दु । आः लानाच्वंगु प्रतिक्रान्तिया ग्रहण ताःहाकःगु ईतक मलाइगु धयादिसें वय्कलं विदेशी प्रतिकृयावादीतय्गु न्ह्यःने माओवादी गबले नं क्वःमछुइगु धयादीगु दु । पत्रकारतय्सं न्यनादीगु न्ह्यसःया लिसः बियादिसें पुलांम्ह अर्थमन्त्री नापं जुयाच्वनादीम्ह डा. भट्टराईं न्हापा सरकारं हःगु नीति व ज्याझ्वःयात लागू यानाः हे त्वःतेगु धयादीगु दु । डा. भट्टराईं समानुपातिक ढंगं व याकनं स्थानीय निकाय गठन मजूसा जनसरकारया नं ख्याच्वः बियादीगु दु ।