'सहमति मजूसाः शान्ति व संविधानया गाडी दुर्घटना जुइ'
प्रधानमन्त्री डा. बाबुराम भट्टराईं राजनीतिक दलत दथुइ आः नं सहमति मजूसाः शान्ति व संविधानया गाडी दुर्घटना जुइगु ख्याच्वः बियादीगु दु । वय्कलं आःया लत्या दुने शान्ति व संविधान निर्माण प्रक्रिया क्वचायेकेगु वा निगूलिं प्रक्रिया भंग यानाः देय्यात भयंकर दुष्चक्रय् यंकेगु बाहेक मेगू विलक्प झीके मदुगु धयादिल ।
प्रधानमन्त्री जुइधुंकाः व्यवस्थापिका संसदय् न्हापांगु खुसिइ सम्बोधन यानादिसें वय्कलं आशंका हे आशंकाया भरय् ई बर्बाद मयासें सहमति मालेत इनाप यानादिल । वय्कलं छुं ईयात शान्ति व संविधानयात क्वचायेकेगु ज्याय् पंग मथनेत नं इनाप यानादिल । वैचारिक राजनीतिक मुद्दाय् स्वस्थ्य प्रतिस्पर्धा यायेत व शान्ति व संविधानय् हातेमालो यानाः न्ह्याः वनेत वय्कलं फुक्कसित आव्हान यानादिल ।
सरकारं यानाच्वंगु ज्या प्रति शंका मयायेत इनाप यानादिसें प्रधानमन्त्री भट्टराईं आःया ज्या 'ट्रेलर' जक जूगुलिं यक्व ज्या याये ल्यँ दनीगु धयादिल । वय्कलं थःम्ह मुस्ताङ गाडी लोकप्रियताया निंतिं छ्यलागु मखसें उकियात राष्ट्रिय आर्थिक बिचाःया प्रतिबिम्ब जूगु धयादिल ।
