दलत निन्हु-स्वन्हु नापं च्वनाः सहलह याःसा समाधान : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' शान्ति व संविधान प्रक्रियाय् दलत दथुइ याकनं हे सहमति जुइगु विश्वास प्वंकादीगु दु । वय्कलं राजनीतिक दलत इमान्दार जुयाः निन्हु-स्वन्हु जक नापं च्वनाः सहलह याःसा फुक्कं विषयलय् सहमति जुइगु धयादिल ।
सर्वहारा कोष व एबीसी टेलिभिजनं शुक्रवाः येँय् याःगु छगू विशेष ज्याझ्वलय् वय्कलं शान्ति व संविधान प्रति माओवादीं क्यंगु इमान्दारिताय् शंका मयायेत इनाप यानादिसें कांग्रेस व एमालेयात यकि ग्वाहालि यायेत इनाप यानादिल । कांग्रेस व एमाले सहमतिइ मवसाः नेपाली जनतां याइगु फैसला थःपिंत मान्य जुइगु वय्कलं धयादिल ।
शासकीय स्वरुप व निर्वाचन प्रणाली सम्बन्धी विवादित मुद्दाय् दलत दथुइ सहमति जुइधुंकूगु खुलासा यानादिसें वय्कलं सहमति सार्वजनिक याये जक ल्यँ दनीगु धयादिल । अथेहे वय्कलं सेना समायोजनया मोडालिटी, ल्याः, मापदण्ड आदि विषयलय् अझ नं विवाद दनीगु धयादिल ।
ज्याझ्वलय् पुलाम्ह प्रधानमन्त्री नापं नेकपा (एमाले)या नायः झलनाथ खनालं थः प्रधानमन्त्री जूगु इलय् शान्ति प्रक्रिया क्वचायेकेत कुतः यानागु खःसां माओवादी व कांग्रेस सत्तामुखी जूगुलिं उगु कार्यभार थःम्ह पूवंकेमफुगु धयादिल । आः नं राष्ट्रिय सहमति आवश्यक जूगु धयादिसें वय्कलं सुयातं छखे लाकाः शान्ति व संविधान निर्माणया ज्या पूवनेमफइगु दावी यानादिल ।
अथेहे नेपाली कांग्रेसया नेता शेरबहादुर देउवां शान्ति प्रक्रिया क्वचायेकाः जक संविधान निर्माण यायेमाःगु खँय् बः बियादिल । वय्कलं सेना समायोजन यायेगु खँ ग्वाहालि यायेत कांग्रेस तयार जूगु धयादिल ।
