मन्त्रिमण्डल विस्तार, खुम्ह न्हूपिं मन्त्रीतपाखें सपथ ग्रहण

प्रधानमन्त्री डा. बाबुराम भट्टराईं थौं स्वक्वःगु खुसिइ मन्त्रिमण्डल विस्तार यानादीगु दु । माओवादी, मधेशी मोर्चा व चिधंगु दलतय् खुम्ह मन्त्रीत दुथ्याकाः वय्कलं मन्त्रिमण्डल विस्तार यानादीगु खः ।

राष्ट्रपति भवन शितल निवासय् बिहीवाः राष्ट्रपति डा. रामवरण यादवया उपस्थितिइ जूगु छगू ज्याझ्वःया दथुइ प्रधानमन्त्री भट्टराईं न्हूपिं मन्त्रीतय्त सपथ ग्रहण याकादीगु खः । माओवादीपाखें लेखराज भट्टं वाणिज्य तथा आपूर्ति व गोपाल किराँतीं संस्कृति मन्त्रीया कथं शपथ ग्रहण यानादीगु खःसा मधेसी जनअधिकार फोरम लोकतान्त्रिकया शरतसिंह भण्डारीं रक्षा, हेमराज तातेडं वातावरण मन्त्री, तराई मधेस लोकतान्त्रिक पार्टीया ब्रजेशकुमार गुप्तां कानुन व संघीय सद्भावना पार्टीया अनिलकुमार झां उद्योग मन्त्री कथं शपथ कयादीगु खः ।