सरकारयात ग्वहालि यायेफइमखु : अनन्त
एकीकृत नेकपा (माओवादी)या सचिवालय् दुजः वर्षमान पुन अनन्तं एमाले नेतृत्वया सरकारयात माओवादीं ग्वहालि यायेमफइगु खँ धयादीगु दु ।
सोमवाः पोखराय् क्रान्तिकारी पत्रकार संघं याःगु ज्याझ्वय् वयेकलं राष्ट्रपति पाखें शितल निवासं, प्रधानमन्त्री पाखें सिंहदरवारं व प्रधानसेनापति पाखें सैनिक मुख्यालय स्वंगु थासं सरकार संचालन यायेगु ज्या मदिकूतल्ले थ्व सरकारयात ग्वहालि यायेमफइगु खँ धयादीगु दु । वयेकलं प्रधानमन्त्री माधवकुमार नेपालया नेतृत्वय् गठन जूगु सरकार असंवैधानिक तवरं गठन जूगु धासें स्वंगु थासं देय संचालन यायेगु ज्या मदिकूसाः अन्त्यत थुकीं देयात विखण्ड याइगु ख्याच्वः बियादिल ।
सरकार क्वथलेत माओवादीं सतकय् मवनेगु धासें नेता पुनं सरकारयात समर्थन याःगु नीछगू दलं हे आन्दोलन यानाः सरकार क्वथलेगु ज्या याइ धयादिल । माओवादीं नागरिक सर्वोच्चताया निंतिं शान्तिपूर्ण आन्दोलन यानाच्वनीगु नं वयेकलं धयादिल । वयेलकं सतक व सदन अवरुद्ध मयासें नं आन्दोलन यायेफइ धकाः माओवादीया शान्तिपूर्ण आन्दोलनं क्यनीगु दाबी यानादिल ।
